مسلم لیگ (ن) پنجاب کی ترجمان عظمیٰ بخاری  نے  کہا ہے کہ عمران خان ایف آئی اے کو اپنے مقصد کیلئے استعمال کررہے ہیں۔

تفصیلات کے مطابق مسلم لیگ (ن) پنجاب کی ترجمان عظمیٰ بخاری  نے  میڈیا سے گفتگو کرتے ہوئے کہا ہے کہ عمران خان کا ذاتی حسد جب نیب سے ٹھنڈا نہیں ہوا تو ایف آئی اے کو استعمال کیا جاتا ہے، عمران خان ایف آئی اے کو اپنے مقصد کیلئے استعمال کررہے ہیں۔

ان کا کہنا ہے کہ عمران خان مقدمات اپنے مخالفین کی زبان بندی کیلئے درج کراتے ہیں، بشیر میمن بتاچکے ہیں عمران خان اپوزیشن کی گرفتاریاں کرا کے آرٹیکل 6 لگوانا چاہتے تھے۔

انھوں نے کہا ہے کہ وزیر داخلہ شیخ رشید  اپوزیشن لیڈر رہنماؤں کو دھمکیاں دیتے ہیں اس کے علاوہ وزیر اطلاعات فواد چوہدری بھی اپوزیشن کو جیل میں بھجوانے کی دھمکی دیتے ہیں۔

مسلم لیگ (ن) پنجاب کی ترجمان عظمیٰ بخاری  نے کہا ہے کہ عمران خان صاحب حمزہ شہباز پر جھوٹا کیس بنانے سے آپکی چینی چوری نہیں چھپ پائے گی، حکومت نے ادویات کھائیں اور پھر کورونا فنڈ بھی کھا لیا ہے۔