یورپین یونین کمشنر برائے داخلہ یلوا جانسن دو روزہ دورے پر اسلام آباد پہنچ گئیں۔

تفصیلات کے مطابق یورپین یونین کمشنر یلوا جانسن وفد کے ہمراہ کل وزارت خارجہ کا دورہ کریں گے۔

یورپین یونین کمشنر کل وزراء برائے داخلہ، تعلیم، سمندر پار پاکستانی، وزیر اعظم، وزیر خارجہ بلاول بھٹو سے ملاقات کریں گی۔

سفارتی ذرائع کا کہنا ہے کہ یورپین کمشنر افغان تارکین وطن کی پاکستان سے بیرون ممالک منتقلی پر مشاورتی اجلاس میں شرکت کریں گی، افغان تارکین وطن کے مشاورتی اجلاس میں برطانیہ، امریکا، کینیڈا اور دیگر سفراء شرکت کریں گے۔

یورپین یونین کمشنر پاکستانی حکام سے امیگریشن امور، غیرقانونی تارکین وطن کا معاملہ اٹھائیں گی۔

یورپی یونین کمشنر برائے داخلہ یلوا جانسن کا ٹویٹ

یورپین یونین کمشنر یلوا جانسن نے سماجی رابطے کی ویب سائٹ ٹوئٹر پر اپنے ایک پیغام میں کہا کہ پاکستان کے دو روزہ دورے پر اسلام آباد پہنچ چکی ہوں، اب حکومتی نمائندگان اور دیگر حکام سے ملاقاتیں کروں گی۔

یلوا جانسن نے کہا کہ دوطرفہ تعلقات کو مزید مضبوط بنانے کے لیے انتہائی مثبت ہوں، مائیگریشن، موبلٹی مذاکرات اور سیکیورٹی تعاون ایجنڈے میں شامل ہے۔