چیئرمین پی ٹی آئی عمران خان نے کہا ہے کہ تحریک انصاف کراچی کی عوام کے ساتھ ہے۔

تفصیلات کے مطابق زمان پارک لاہور میں پی ٹی آئی سندھ کے وفد کی چیئرمین عمران خان سے اہم ملاقات ہوئی۔

ملاقات میں پی ٹی آئی رہنما علی زیدی نے سندھ کی مجموعی سیاسی صورتحال سے چئیرمن پی ٹی آئی عمران خان کو آگاہ کیا اور سندھ میں بلدیاتی الیکشن کے دوسرے مرحلے کے نتائج سمیت دیگر امور پر بھی گفتگو ہوئی۔

اس موقع پر چیئرمین پی ٹی آئی عمران خان کی جانب سے آفتاب صدیقی کو کراچی کا نیا صدر مقرر کردیا گیا جبکہ بلال غفار مرکزی نائب صدر اور چئیرمن پی ٹی آئی عمران خان کی معاشی ٹیم کا حصہ ہوں گے۔

عمران خان کی جانب سے خرم شیر زمان کو پی ٹی آئی سینٹرل ایگزیکٹو کمیٹی کا ممبر نامزد کردیا گیا۔

ملاقات میں عمران خان نے پی ٹی آئی رہنماؤں کو کراچی کے ضمنی الیکشن کی مہم تیز کرنے ہدایت کردی۔

یہ بھی پڑھیں؛ الیکشن کے علاوہ پاکستان کے مسائل کا کوئی حل نہیں ، عمران خان

عمران خان نے کہا کہ کراچی کے عوام نے رجیم چینج پر بننے والی سرکار کو مسترد کردیا ہے، کراچی کے عوام اکیلے نہیں تحریک انصاف ان کے ساتھ ہے۔

انہوں نے کہا کہ کراچی میں ماضی میں بھی ساری جماعتوں نے پی ٹی آئی کا مقابلہ کیا پھر بھی شکست مقدر بنی۔

چیئرمین پی ٹی آئی عمران خان نے مزید کہا کہ کراچی کے باشعور عوام اپنے بہتر مستقبل کیلئے تحریک انصاف کے نمائندوں کو کامیاب کریں گے۔

یہ بھی پڑھیں؛ الیکشن کی تاریخ دینے میں جان بوجھ کر تاخیر کی جارہی ہے، عمران خان

ملاقات میں مرکزی سیکریٹری جنرل اسد عمر، سندھ کے صدر علی زیدی، جنرل سیکرٹری مبین جتوئی، وفد میں حلیم عادل شیخ، خرم شیر زمان، بلال غفار، ارسلان تاج، شہزاد قریشی، سدرہ عمران، اکرم چیمہ، آفتاب صدیقی، اسلم خان، فہیم خان ، افتاب جھانگیر اور عالمگیر خان بھی موجود تھے۔