سابق وزیراعلیٰ پنجاب پرویز الٰہی نے کہا ہے کہ چیئرمین پی ٹی آئی عمران خان کے تاریخی جلسہ نے حکومت پر سکتہ طاری کر دیاہے۔

تفصیلات کے مطابق سابق وزیراعلیٰ پنجاب و مرکزی صدر پاکستان تحریک انصاف چوہدری پرویزالٰہی سے مختلف سیاسی رہنماؤں کی ملاقات  ہوئی ہے جس دوران عمران خان کے خلاف حکومتی کارروائیوں کی بات کی گئی ہے۔

انہوں نے کہا ہے کہ شہباز شریف آٹا اسٹنٹ سے عوام کو بیوقوف نہیں بنا سکتے اور نا ہی آٹے کا ایک تھیلا دے کر لوگوں کے ضمیر اور ووٹ خرید سکتے ہیں۔

انہوں نے مزید کہا کہ ہر شہر میں آٹے کی لائن میں روزانہ ایک قیمتی جان ضائع ہوتی ہے لیکن شہباز شریف شعبدہ بازیوں سے پھر بھی باز نہیں آتے ہیں۔

چوہدری پرویز الٰہی نے کہا کہ عمران خان نے قوم کو عزت و وقار سے جینے کا شعور دیا ہے، ان کے تاریخی جلسہ نے حکومت پر سکتہ طاری کر دیاہے، وہ وکٹری اسٹینڈ پر پہنچ چکے ہیں، مقدمے، گرفتاریاں اور پر تشدد کارروائیاں اب بیکار ہیں۔

ان کا کہنا تھا کہ عمران خان کو دوبارہ برسراقتدار آنے سے روکنے کیلئے پی ڈی ایم ملک کو مارشل لا کی طرف دھکیلنا چاہتی ہے لیکن پی ڈی ایم حکومت کی ملک میں مارشل لا لگوانے کی خواہش کبھی پوری نہیں ہو گی۔

انہوں نے بتایا کہ دنیا بھر میں پاکستان کے ملکی اور غیر ملکی خیر خواہ پاکستان کو جلد از جلد الیکشن کرانے کا مشورہ دے رہے ہیں ادارے بھی سمجھتے ہیں کہ موجودہ معاشی حالات کسی ایڈونچرکے متحمل نہیں ہو سکتے۔

انہوں نے کہا کہ الیکشن کے سوا موجودہ سیاسی اور معاشی بحران کا کوئی حل نہیں ہے اور الیکشن کے بعدپنجاب میں ن لیگ کی سیاسی موت اور پی ڈی ایم کی سیاست انشاء اللہ دفن ہو جائے گی۔