متحدہ قومی موومنٹ (ایم کیو ایم) پاکستان نے مسلم لیگ (ن) سے سندھ کی گورنر شپ کا مطالبہ کر دیا ہے۔

ذرائع کے مطابق ایم کیو ایم پاکستان اور مسلم لیگ ن کے درمیان آج اسلام آباد میں مذاکرات ہوں گے، اجلاس میں فیصلہ ہوگا کہ ایم کیو ایم کو سندھ کی گورنر شپ ملے گی یا نہیں۔

ذرائع نے بتایا ہے کہ ایم کیو ایم پاکستان اہم مذاکرات میں گورنر سندھ کے عہدے پر اصرار کرے گی۔

ایم کیو ایم کے ذرائع کا کہنا ہے کہ بغیر کسی اہم عہدے کے 17 نشستوں والی جماعت کے ساتھ اتحاد نہیں کیا جاسکتا، پہلے بلدیاتی نظام اور آئینی ترمیم پر بات ہوگی اس کے بعد کابینہ میں شرکت کا فیصلہ ہوگا۔

واضح رہے کہ اس سے قبل ایم کیو ایم پاکستان کے سینئر ڈپٹی کنوینر مصطفیٰ کمال نے اپنے ایک بیان میں کہا تھا کہ سندھ میں گورنر شپ متحدہ کا حق ہے، دستبردار نہیں ہوں گے، کامران ٹیسوری کی بطور گورنر کارکردگی عمدہ ہے، انہی کو آگے چلنا چاہیے۔

انہوں نے کہا کہ گورنر سندھ کامران ٹیسوری بہت اچھا کام کر رہے ہیں، پورے ملک میں تمام گورنر سے زیادہ متحرک ہیں، نہیں چاہتے سندھ کی گورنر شپ کے معاملے پر کوئی بحث ہو۔

مصطفیٰ کمال نے مزید کہا کہ ایم کیو ایم کے پاس کراچی کا 80 فیصد اور حیدرآباد کا 100 فیصد مینڈیٹ ہے، تو گورنر شپ بھی ایم کیو ایم کا حق ہے، حکومت میں برائے نام نہیں رہنا چاہتے، ڈیڈ لاک کوئی نہیں ہے، معاملات طے پا جائیں گے۔