پاکستان پیپلز پارٹی کے چیئرمین بلاول بھٹو زرداری نے ایسٹر کے موقع پر اپنے پیغام میں دنیا میں پرامن بقائے باہمی کی اہمیت پر زور دیا ہے۔

پی پی پی چیئرمین بلاول بھٹو زرداری نے پاکستان سمیت دنیا بھر کی مسیحی برادری کو ایسٹر کی مبارکباد دیتے ہوئے کہا کہ ایسٹر کی امید اور تجدید کا پیغام نہ صرف روحانی دنیا بلکہ سیاسی میدان میں بھی بڑی اہمیت کا حامل ہے۔

انہوں نے کہا کہ پاکستان کی مسیحی برادری کی غیر متزلزل حب الوطنی پر فخر ہے، پاکستان کی مسیحی برادری کی تعلیم اور صحت سمیت زندگی کے مختلف شعبوں میں گراں قدر خدمات ہیں۔

بلاول بھٹو نے کہا کہ قوم کی ترقی میں مسیحی کمیونٹی کا کردار بھی کلیدی رہا ہے، شہید بھٹو کے نظریے، بی بی شہید کے فلسفے اور 1973 کے آئین کے اصولوں کی رہنمائی میں، ہم ہر شہری کو قوم کا قیمتی اثاثہ سمجھتے ہیں۔

انکا کہنا تھا کہ ہم سب پاکستانی ایک تابناک و خوشحال مستقبل کی جانب اپنے اجتماعی سفر میں متحد ہیں، میری زیرِ قیادت پیپلز پارٹی نے ایک مسیحی جیالے کو سندھ اسمبلی کا ڈپٹی اسپیکر منتخب کیا ہے، پیپلز پارٹی نے ایک نوجوان مسیحی خاتون روما مشتاق مٹو کو بطور ایم پی اے منتتخب کرایا ہے، یہ اقدام پاکستان پیپلز پارٹی کے تنوع اور وسیع تر شراکت کے عزم کے آئینہ دار ہیں۔

چیئرمین پی پی نے کہا کہ آج کے دن مادر وطن میں اتحاد اور ہم آہنگی کو قائم و دائم رکھنے کے عزم کا اعادہ کرتے ہیں، تاریخی طور اس سرزمین پر متنوع عقائد، ثقافتوں اور روایات کے لوگ صدیوں سے امن و آشتی کے ساتھ رہتے آئے ہیں۔

بلاول بھٹو زرداری نے مزید کہا کہ دعاگو ہوں کہ یہ پرمسرت موقع سب کے لیے خوشحالی اور باہمی افہام و تفہیم سے بھرے ایک نئے دور کی نویدِ صبح ثابت ہو۔