پاکستان  میں 10 سال بعد ہونے والی ٹیسٹ سیریز کے دوسرے میچ میں  فتح کے ساتھ نہ صرف سیریز پاکستان کے نام ہوئی بلکہ اس ٹیسٹ میں قومی ٹیم کے کھلاڑیوں نےکئی منفرد  مجموعی  ا ور انفرادی ریکارڈز بھی  اپنے نام کیے۔

جہاں عابد علی اور شان مسعود نے پاکستان کے لیے ٹیسٹ  کی دوسری بڑی اوپننگ پارٹنر شپ کا ریکارڈ قائم کیا وہیں  عابد علی نے دومنفرد انفرادی ریکارڈز بھی اپنے نام کیے۔

عابد علی نے ڈیبیو ٹیسٹ میں سنچری اسکور کرکے کرکٹ کی تاریخ میں ون ڈے اور ٹیسٹ  ڈیبیو میں سنچری اسکور کرنے والے واحد مرد کھلاڑی ہونے کا اعزاز حاصل کیا۔

اس کے علاوہ عابد علی اپنے کیریئر کے دوسرے ٹیسٹ میں بھی سنچری اسکور کر کے ابتدائی دو ٹیسٹ میچز میں سنچری  بنانے والے دنیا کے  آٹھویں  اور پہلے پاکستانی کھلاڑی بن گئے۔

عابد علی، شان مسعود، اظہر علی اور بابر اعظم نے سنچریز اسکور کر کے ایک اننگز میں ابتدائی چار بلے بازوں کی جانب سے سنچری اسکور کرنے کا  عالمی ریکارڈ بھی برابر بھی کردیا۔

پاکستان نے ٹیسٹ سیریز اپنےنام کرلی

ٹیسٹ کرکٹ کی تاریخ میں یہ دوسرا موقع ہے کہ جب کسی ٹیم کے چار ابتدائی بلے بازوں نے ایک ہی  اننگ میں سنچریزاسکور کیں۔

اس سے قبل 2007 میں  بھارت کے دنیش کارتک، وسیم جعفر،راہول ڈریوڈ اور سچن ٹنڈولکر نے بنگلہ دیش کے خلاف پہلی اننگ میں سنچریز اسکور  کی تھیں۔

دوسرے ٹیسٹ میچ کے آخری روز نوجوان فاسٹ بالر نسیم شاہ نے 5 وکٹیں حاصل کرکے کم عمر ترین فاسٹ بالر ہونے کا اعزاز حاصل کیا۔

اس سے قبل 5 وکٹیں حاصل کرنے والےکم عمر ترین فاسٹ بالر کا اعزاز  بھی پاکستانی کھلاڑی محمد عامر کے پاس تھا ۔انہوں نے 2009 میں آسٹریلیا کے خلاف میلبرن میں یہ کارنامہ انجام دیا تھا۔

واضح رہے کہ 5 وکٹیں لینے سب سے  کم عمر بالر پاکستان کے لیفٹ آرم اسپنر نسیم الغنی ہیں ۔