کورونا وائرس کے باعث پی ایس ایل فائیوکے ملتوی ہونے والے پلے آف مرحلے اور فائنل کےحوالے سے کل پیش رفت کا امکان ظاہر کیا گیا ہے۔

پاکستان سپر لیگ کی گورننگ کونسل کا اہم اجلاس کل ویڈیو لنک کے ذریعے ہوگا۔

اجلاس میں چئیرمین پاکستان کرکٹ بورڈ احسان مانی، چیف ایگزیکٹو وسیم خان سمیت پی ایس ایل فرنچائزز کے نمائندے شرکت کریں گے،اجلاس میں پی ایس ایل فائیو کے ملتوی شدہ میچز کا معاملہ زیر غور آئے گا۔

‏چاروں میچز کرانے اور اسی مقام پر پاکستان سپر لیگ فائیو کو ختم کرنے کے آپشنز پر بھی غورکیا جائے گا اور اہم‏ اجلاس میں پی ایس ایل کو الگ شعبہ بنانے پر بھی بریفنگ دی جائے گی۔

اجلاس میں فرنچائزز کی جانب سے لکھے گئے خط پر بھی بات چیت کا امکان ہے۔

یاد رہے کہ فرنچائزز نے خط کے ذریعے پاکستان کرکٹ بورڈ کے حکام کی کئی مطالبات کی طرف توجہ مبذول کرائی تھی اور فرنچائزز نے خط کے ذریعے ‏فیس کے لیے بینک گارنٹی ختم کرنے اورمالکانہ حقوق کی مدت بڑھانے کا مطالبہ بھی کیا تھا۔

فرنچائزز نےپی سی بی حکام سے ‏ڈالر کی ایک حد مقرر کرنے اور نئے ٹیکس کو ختم کرنے جیسے مطالبات بھی کیےتھے۔