قومی ٹیم کے کپتان بابر اعظم نے شاہین شاہ آفریدی کو اس وقت دنیا کا بہترین بولر قرار دیا ہے۔

پاکستان کرکٹ ٹیم کے کپتان بابراعظم جو اس وقت ون ڈے اور ٹی ٹوئنٹی میں نمبر ون بیٹسمیں ہیں، انہوں نے شاہین شاہ کو ہر فارمیٹ میں ٹاپ ٹین کی فہرست میں شامل ہونے کا مستحق قرار دیا ہے۔

بابر اعظم کا کہنا تھا کہ شاہین شاہ جس طرح سے کام کرتے ہیں اور پرفارم کرتے ہیں، انہیں اپنے کیریئر میں مزید آگے جانا ہے۔

ان کا کہنا تھا کہ شاہین ہر فارمیٹ میں بلے بازوں کے لیے خطرہ بنے ہوئے ہیں۔

بابر نے لاہور میں پریس کانفرنس کرتے ہوئے کہا کہ وہ خوش قسمت ہیں کہ ان کے پاس اتنا محنتی اور باصلاحیت بولر ہے۔

انہوں نے مزید کہا کہ شاہین میرے لیے نمبر ون بولر ہیں۔ وہ رینکنگ میں بھی پہلے نمبر پر آئیں گے۔

علاوہ ازیں بابر اعظم نے اپنی پریس کانفرنس میں آسٹریلیا کے خلاف حال ہی میں ہونے والی سیریز کی اہمیت پر بھی روشنی ڈالی اور کہا کہ اس سے دیگر ٹیموں کو بھی پاکستان کا دورہ کرنے پر آمادہ کیا جائے گا۔

یہ بھی پڑھیں: بابر اعظم کو عالمی نمبر ایک بلے باز کے طور پر ایک سال مکمل ہوگیا

پوری سیریز میں شائقین کی تعداد لاجواب رہی، اپنی سرزمین پر بڑے ستاروں کو دیکھنا ہمیشہ مثبت ہوتا ہے۔ یہ دورہ آسٹریلیا دوسری ٹیموں کے پاکستان آنے میں اہم کردار ادا کرے گا۔