شوبزانڈسٹری سے حال ہی میں کنارہ کشی اختیار کرنے والی سابقہ گلوکارہ رابی پیرزادہ نے کہا ہےعمرہ کرنے کے بعد اُنہیں احساس ہوا کہ ان کی پرانی زندگی ایک نشے والی زندگی تھی جس میں وہ خود کو ضائع کر رہی تھیں۔

تفصیلات کے مطابق وائس آف امریکہ کے ساتھ ایک انٹرویو میں رابی پیرزادہ نے کہا کہ وہ شوبز انڈسٹری میں رہتے ہوئے بھی بہت سے گناہوں سے بچی ہوئی تھیں۔

انھوں نے بتا یا کہ جب وہ میڈیا پر آ کر اللہ کی باتیں کرتی ہیں تو اس سے بعض لوگوں کو تکلیف ہوتی ہے،چند لوگوں کو ان کا میڈیا پر آکر اللہ کی باتیں کرنا پسند نہیں، ایسے لوگوں کی تعداد دو سے تین فیصد ہے۔

سابقہ اداکارہ نے کہا کہ وہ خود کو مزید ضائع نہیں کرنا چاہتیں اور اللہ کو بتانا چاہتی ہیں کہ اس کی ایک بندی ہے جو برائی کی راہ چھوڑ چکی ہے۔

انہوں نے کہا کہ جب میں نے کہا کہ “میرا جسم میری مرضی” نہیں بلکہ “میرا جسم میرے اللہ کی مرضی” تو اس پر کچھ خواتین اور خاص طور پر میڈیا سے تعلق رکھنے والی خواتین مجھ سے ناراض ہو گئی۔

رابی پیرزادہ نے انکشاف کیا کہ ایف آئی اے والوں نے ان کی نازیبا ویڈیو لیک کرنے والوں کا پتا لگالیا تھا تاہم انہیں بتایا گیا کہ ان کے خلاف کارروائی کرنے سے ان کی جان کو خطرہ ہوسکتا ہے۔

رابی پیرزادہ نے توبہ کے بعد اپنی پہلی سالگرہ مدینے میں منائی

رابی پیرزادہ نے مزید کہا کہ انہوں نے اس وقت شوبز سے کنارہ کشی اختیار کی جب وہ شہرت کی بلندیوں پر تھیں اور بہت پیسے کما رہی تھیں۔

جب ان کی وائرل ویڈیوز آئیں تو ان کا کام مزید بڑھ گیا تھا اور ہر کوئی اُنہیں کام کی آفرز کر رہا تھا۔

رابی نے کہا کہ یہ پیغام دینا بہت ضروری تھا کیونکہ مجھ سے پہلے جس کی بھی اس طرح کی ویڈیوز لیک ہوئیں تو وہ راتوں رات سپر اسٹار بن گئے، میں بھی سپر اسٹار بن جاتی اور لوگ دو تین دن میں سب بھول جاتے لیکن میں نے ایسا نہیں کیا۔