کرونا وائرس کے باعث ایران کےسابق سفیرسعید ہادی کا انتقال ہوگیا۔ مقامی میڈیا کے مطابق وہ تہران کے اسپتال میں زیرعلاج تھے۔

ایرانی خبر ایجنسی کے مطابق کرونا وائرس کے باعث ایران میں ابھی تک 26 ہلاکتیں ہوچکی ہیں جبکہ مہلک وائرس نے 245 افراد کو متاثر کیا ہے۔

سعید ہادی ویٹی کن میں بطور سفیر خدمات انجام دے چکے ہیں، ان کی عمر 81 سال تھی۔

ایران کی نائب صدر برائے خواتین اور عائلی امور معصومہ ابتکار بھی کرونا وائرس کا شکار ہو گئی ہیں۔

غیر ملکی میڈیا کے مطابق نائب صدر معصومہ ابتکار کے کرونا وائرس کے ٹیسٹ مثبت آئے ہیں۔

وہ صدر حسن روحانی کی کابینہ کی پہلی خاتون رکن ہیں جو کرونا وائرس کا شکار ہوئی ہیں۔

دوسری جانب کرونا وائرس کے بڑھتے خطرات کے باعث ایران میں نماز جمعہ کےاجتماعات منسوخ کردیے گئے۔