جمعیت علمائے ہند نے بھارتی ریاست اترپردیش میں حلال مصنوعات کی فروخت پر عائد پابندی کو عدالت میں چیلنج کرنے کا اعلان کردیا۔

کشمیرمیڈیا سروس کی رپورٹ کے مطابق بھارتی ریاست اتر پردیش کے وزیر اعلیٰ یوگی آدتیہ ناتھ نے حلال مصنوعات کی فروخت پر پابندی عائد کرنے کا فیصلہ کیا تھا۔

رپورٹ کے مطابق جمعیت علمائے ہند کے حلال ٹرسٹ کے چیف ایگزیکٹو آفیسر نیاز احمد فاروقی نے حلال مصنوعات کی فروخت پر پابندی عائد کرنے کے فیصلے کی شدید مذمت کرتے ہوئے اسے عدالت میں چیلنج کرنے کا اعلان کردیا ہے۔

انہوں نے کہا کہ حلال سرٹیفائیڈ ہونے سے ان مصنوعات پر دنیا بھر کے مسلمانوں میں بھروسہ پیدا ہوتا ہے۔ اس سے برآمدات میں اضافہ اور کاروبار میں منافع ہوتا ہے۔

نیاز احمد نے مزید کہا کہ جمعیت علمائے ہند کے حلال سرٹیفکٹ کی دنیا بھر میں مثبت شبیہ ہے۔ یہ سرٹیفکٹ صارفین کو ان مصنوعات کا استعمال کرنے سے بچاتے ہیں، جس کا استعمال وہ مناسب نہیں سمجھتے۔

دوسری جانب اترپردیش حکومت کے حکم پر محکمہ فوڈ سیکیورٹی و میڈیسن کی ایڈمنسٹریشن نے حلال ٹیگ والی مصنوعات کی فروخت روکنے کے لیے تیاریاں شروع کردی ہیں۔