امیر جماعت اسلامی سراج الحق نے کہا ہے کہ حکومت کی غلط پالیسیوں نے عوام کو نان شبینہ کا محتاج بنادیا ہے، حکومت کو ووٹ اور سپورٹ دینے والے سب پریشان ہیں ۔

تفصیلات کے مطابق امیر جماعت اسلامی سراج الحق نے اپنت ایک بیان میں کہا کہ مسکراہٹ چور حکومت نے قومی مفادات کو ذاتی مفادات کی بھینٹ چڑھا دیاہے، جن لوگوں نے قوم کو ٹرک کی بتی کے پیچھے لگایا تھا ، وہ خود بھی پریشان ہیں ۔

اپنے بیان میں امیر جماعت اسلامی نے کہا کہ حکومت بہت جلد ایکسپوز ہوگئی ہے، سرخی پاﺅڈر اترنے کے بعد اس کا اصل چہرہ عوام کے سامنے آگیاہے ۔

سراج الحق نے یہ بھی کہا کہ تبدیلی پہلے مذاق اور اب خوف کی علامت بن چکی ہے، حکومت نے ملک کے حال کو بدحال اور مستقبل کو تاریک کردیا ہے۔

امیر جماعت اسلامی کا کہنا تھا کہ وزیراعظم نے کہاتھاکہ2020 ءخوشخبریوں کا سال ہوگا لیکن ا ب تک ان کے تمام دعوے الٹ ثابت ہوئے ہیں ۔

 سراج الحق کا یہ بھی کہنا تھا کہ وزیراعظم اب بھی چوروں کو نہ چھوڑنے کی بات کرتے ہیں مگر ان کی گفتگو میں پہلے والا دم خم نہیں رہا ۔

 سراج الحق نے کہا وزیراعظم نے کچھ پیاروں کی خاطر عوام کو مہنگائی کے سونامی کے حوالے کر دیاہے لیکن عمران خان  گھبرائیں نہیں ، آٹا و چینی بحران پیدا کرنے والوں کے نام بتادیں ۔

وزیراعظم نے ملک کو دلدل میں دھکیل دیاہے، سراج الحق

امیر جماعت اسلامی سراج الحقنے ان ہاؤس تبدیلی کی مخالفت کرتے ہوئے  مزید کہا کہ ایسے اقدام کے خلاف بھرپور احتجاج کریں گے اور پوری قوت سے مزاحمتی تحریک کو آگے بڑھائیں گے۔

واضح رہے کہ اس سے قبل بھی  سراج الحق نے لاہور میں تقریب سے خطاب کرتے ہوئے کہا  تھا کہ وزیراعظم کے قوم سے وعدے ہوا میں تحلیل ہو گئے ہیں، موجودہ حکومت وینٹی لیٹر پر ہے مصنوعی سانس سے کب تک زندگی بچائی جائے گی ۔

سراج الحق نے کہا تھا کہ وزیراعظم نے اعلان کیا تھاکہ پی ٹی آئی کے سونامی نے لوگوں سے روزگار ، چھت اور اب نوالہ چھیننا شروع کردیا ہے ۔