جمعیت علمائے اسلام (ف) کے سربراہ مولانا فضل الرحمان کی طبیعت ناساز ہونے پر انہیں اسلام آباد کے پمز اسپتال لایا گیا، جہاں انہوں نے تفصیلی طبی معائنہ کرایا۔
ذرائع کے مطابق مولانا نے پمز اسپتال میں ماہر ڈاکٹرز سے چیک اپ کروایا، جس میں خون کے ٹیسٹ، ایکسرے اور الٹرا ساؤنڈ شامل تھے۔
ڈاکٹر کی ہدایت پر یہ تمام معائنے کیے گئے تاکہ مکمل تشخیص ممکن بنائی جا سکے۔
اس موقع پر پمز کے جوائنٹ ایگزیکٹو ڈائریکٹر ڈاکٹر اقبال درانی بھی ان کے ہمراہ موجود رہے، جبکہ اسپتال کے سیکیورٹی انچارج ضیغم شہزاد نے سیکیورٹی امور کی نگرانی کی۔
تمام طبی معائنے مکمل ہونے کے بعد پمز اسپتال کی انتظامیہ نے مولانا کو رخصت کر دیا، اور وہ اسپتال سے روانہ ہو گئے۔
قریبی ذرائع کے مطابق، مولانا فضل الرحمان کی صحت کے حوالے سے فی الحال کوئی تشویشناک بات سامنے نہیں آئی، تاہم مکمل رپورٹس آنے کے بعد مزید معلومات فراہم کی جائیں گی۔
