نیب کی جانب سے خواجہ برادران کی بریت کی درخواستوں پر جواب احتساب عدالت میں جمع کرادیا گیا ہے۔

جمع کرائے جانے والے جواب میں بتایا گیا ہے کہ پیراگون ریفرنس میں تازہ ثبوتوں کی روشنی میں خواجہ برادران پر لگے الزامات کالعدم ہو گئے ہیں۔

جواب میں بتایا گیا ہے کہ تین اشتہاری ملزمان کے شامل تفتیش ہونے پر پیش شہادتوں سے خواجہ برادران پر الزامات رد ہوئے ہیں تاہم تازہ شہادتوں پر ایک تفتیشی رپورٹ تیاری کی جارہی ہے اور مجاز اتھارٹی کی منظوری کے بعد یہ رپورٹ عدالت میں جمع کرائی جائے گی۔

نیب نے اپنے جواب میں بتایا ہے کہ وعدہ معاف گواہ اور اس وقت کے چئیرمین پیراگون قیصر امین بٹ اپنے پہلے بیان سے منحرف ہو گئے ہیں تاہم اشتہاری رہنے والے ملزمان کے ثبوتوں سے ثابت ہوتا ہے کہ خواجہ برادران پیراگون سوسائٹی کے پارٹنر نہیں تھے۔

خواجہ برادران کو جو پیسے ٹرانسفر ہوئے وہ انکی پیراگون کو دی جانے والی سروسز کے لیے تھے تاہم عدالت خواجہ برادران کی بریت کی درخواستوں پر قانون کے مطابق فیصلہ کرے۔

خیال رہے کہ احتساب عدالت نے خواجہ سعد اور سلمان رفیق کی بریت کی درخواستوں پر نیب سے جواب مانگا تھا تاہم احتساب عدالت خواجہ برادران کی بریت کی درخواستوں پر 13 دسمبر کو سماعت کرے گی۔