شمالی وزیرستان کے علاقے میر علی میں سیکیورٹی فورسز نے خوارجیوں کا خودکش حملہ ناکام بناتے ہوئے چھ خوارجیوں کو ہلاک کردیا جب کہ سیکیورٹی فورسز کے ایک جوان شہید اور چھ زخمی ہوئے۔
سیکیورٹی ذرائع کے مطابق ایک خوارج نے بارود سے بھری گاڑی سیکیورٹی فورسز کے کیمپ کی دیوار سے ٹکرا دی جس کے نتیجے میں زور دار دھماکہ ہوا اور دیوار کا کچھ حصہ منہدم ہوگیا۔
سیکیورٹی ذرائع کا کہنا ہے کہ اسی دوران پانچ مزید خوارجی کیمپ کے اندر گھسنے کی کوشش کر رہے تھے تاہم سیکیورٹی اہلکاروں نے بروقت کارروائی کرتے ہوئے انہیں کیمپ کے باہر ہی جہنم واصل کردیا۔
ذرائع نے بتایا کہ گزشتہ چار روز کے دوران افغان طالبان کے بھیجے گئے 108 خوارجیوں کو سیکیورٹی فورسز کی کارروائیوں میں ہلاک کیا جاچکا ہے۔
سیکیورٹی ذرائع کا مزید کہنا ہے کہ تازہ واقعے میں حملے کے بعد پوسٹ کی چھت گرنے سے ایک اہلکار شہید اور چھ زخمی بھی ہوئے۔
سیکیورٹی ذرائع نے یہ بھی بتایا کہ نیشنل ایکشن پلان کے تحت آخری خوارجی کے خاتمے تک افواجِ پاکستان اور سیکیورٹی فورسز عوام کے تعاون سے ملک کے دفاع کے لیے ڈٹی رہیں گی۔
