وزیراعلیٰ خیبرپختونخواہ کی جانب سے صوبے بھر میں اسمارٹ لاک ڈاؤن کو مزید مؤثر بنانے کا فیصلہ کیا گیا ہے۔

تفصیلات کے مطابق وزیر اعلیٰ محمود خان کی زیر صدارت صوبائی ٹاسک فورس برائے انسداد کورونا کا اجلاس ہوا جس میں صوبے بھر میں اسمارٹ لاک ڈاؤن کو مزید مؤثر بنانے کا فیصلہ کیا گیا ہے۔

اجلاس میں وزیر اعلیٰ محمود خان نے کہا ہے کہ بازاروں میں ایس او پیز پر عملدرآمد کو یقینی بنانے کے لئے تاجر تنظیموں سے بات کی جائے۔

اجلاس کو سمارٹ لاک ڈاؤن اسٹریٹیجی پر عملدرآمد کی صورتحال، اسپتال کی استعداد کار کو بڑھانے کے لئے پیشرفت پر بھی بریفنگ دی گئی۔

اسمارٹ لاک ڈاؤن کے حوالے سے شہریوں کے لئے ہدایات جاری

اجلاس میں آنے والے عید کے حوالے سے ایس او پیز اور اس حوالے سے حکمت عملی بنانے کے لئے کمیٹی تشکیل کردی گئی ہے جبکہ عید قربان کے لئے جانوروں کی خریداری کے لئے مخصوص ایس او پیز کے تحت منتخب مقامات پر مویشی منڈیاں قائم کرنے کا فیصلہ کیا گیا ہے۔

دوران اجلاس مارکیٹوں اور بازاروں میں ایس او پیز پر عملدرآمد کو یقینی بنانے کے لئے انتظامیہ کو اقدامات لینے کی ہدایت کردی گئی ہے اور ہدایات جاری کی ہین کہ اس کے باوجود جن مارکیٹوں میں ایس او پیز پر عملدرآمد نہ ہو ان مارکیٹوں کو بند کر دیا جائے۔

اجلاس میں نو تعمیر شدہ پشاور انسٹیوٹ آف کارڈیالوجی کو کورونا مریضوں کے استعمال میں لانے فیصلہ کیا گیا ہے اور اس مقصد کے لئے محکمہ صحت کو درکار طبی وعملے کی فوری دستیابی کے لئے پلان بنانے کی ہدایت بھی کردی گئی ہے۔

وزیراعلیٰ کی جانب سے کارڈیالوجی انسٹیٹیوٹ کی نئی عمارت میں یوٹیلٹی کنکشنز فوری مکمل کرنے کے لئے متعلقہ اداروں کو ہدایت کردی گئی ہے جبکہ اجلاس میں بتایا گیا ہے کہ جولائی کے وسط تک انسٹیٹیوٹ آف کارڈیالوجی میں 40 آئی سی یو بیڈز، 110 ایچ ڈی یو بیڈز اور 100 آئسولیشن بیڈز قائم کیے جائیں گے۔

بریفنگ کے دوران بتایا گیا ہے کہ پشاور کے دو تدریسی اسپتالوں ایل آر ایچ اور کے ٹی ایچ میں کورونا کے مریضوں کے لئے کافی بیڈز دستیاب ہیں جس کے متعلق ہدایات جاری کی گئی ہیں کہ صوبے کے تدریسی اسپتالوں میں کورونا کے مریضوں کے لئے مختص بیڈز کو بہتر انداز میں مینیج کرنے کے لئے ان ہسپتالوں کے فوکل پرسنز مقرر کئے جائیں۔