انگلینڈ سے تعلق رکھنے والی خاتون کو 15 سال سے نابینا ہونے کا ڈھونگ رچانا خاتون کو مہنگا پڑگیا ہے۔

غیر ملکی خبر رساں ادارے کے مطابق انگلینڈ سے تعلق رکھنے والی خاتون نے تقریباً 10 لاکھ پاؤنڈ امدادی رقم حاصل کی۔

انگلینڈ کے شہر مانچسٹر کی عدالت نے 15 سال سے نابینا ہونے کا ڈھونگ رچا نے والی ادھیڑ عمر خاتون کو 3 برس 8 ماہ قید کی سزا سنا دی۔

حیرت کی بات یہ ہے کہ 65 سالہ کرسٹینا نے 15 برس کے دوران تقریباً 10 لاکھ پاؤنڈ سببے زائد حکومتی امداد کی مد میں حاصل کیے جو ماہانہ اوسطاً 13 ہزار پاؤنڈ بنتی ہے۔

یاد رہے کہ کرسٹینا نے اپنی دو شناخت بنا رکھی تھی اور برطانوی حکومت سے اپنی معذوری کے بدلے ماہانہ وظیفہ وصول کرتی تھیں۔

خیال رہے کہ کرسٹینا اس وقت قانون کی نظروں میں آگئیں جب انہیں سی سی ٹی وی فوٹیج میں اخبار پڑھتے اور اسکول سے اپنے پوتے کو لیتے ہوئے دیکھا گیا۔

دوسری جانب خاتون نے عدالت میں مؤقف اختیار کیا کہ انہوں نے رقم ضرورت مندوں میں تقسیم کی تھی۔

اس کے علاوہ انہوں نے اقرار کیا کہ امدادی رقم میں سے انہوں نے متعدد مرتبہ سیاحتی دورہ کیا، کپڑے خریدے اور جلد کی سرجری کرائی۔

اس حوالے سے عدالت نے کہا کہ یہ وہ رقم تھی جس کی آپ حقدار نہیں تھی، 15 سال آپ نے اپنے ساتھی شہریوں سے 10 لاکھ پاؤنڈ چوری کیے۔

علاوہ ازیں عدالت نے خاتون کی 34 سالہ بیٹی اینی براؤن کو 70 ہزار پاؤنڈ کی منی لانڈرنگ کے الزام میں 18 ماہ کی سزا سنا دی اورکہا کہ اینی براؤن نے اپنی والدہ کے پاس اتنی بڑی رقم ہونے پر شکوک کا اظہار لیکن پولیس کو مطلع نہیں کیا۔

واضح رہے کہ کرسٹینا نے ایک عام برطانوی شہری کی تنخواہ کے مقابلے میں ماہانہ 5 گنا زیادہ رقم حاصل کی۔