وفاقی وزیر برائے منصوبہ بندی اسد عمر نے کہا ہے کہ سندھ حکومت نے میئر کراچی کو مفلوج کردیا ہے۔

تفصیلات کے مطابق کے الیکٹرک کے لئے کئے جانے والے دھرنے میں خطاب کرتے ہوئے وفاقی وزیر اسد عمر نے کہا کہ میئر کراچی سندھ حکومت کی وجہ سے کام نہیں کرپا رہے ہیں۔

انہوں نے کہا کہ  پہلے متحدہ قومی موومنٹ کو کراچی کی آواز اٹھانے میں مشکلات تھیں لیکن آج  اہم فیصلے کرنے والے لوگ کراچی سے تعلق رکھتے ہیں۔

انہوں نے بتایا کہ کراچی کے بجلی کا نظام پرائیویٹائز کیا گیا کراچی کی نجکاری نہیں کی گئی لیکن اب حکومت کراچی کے عوام کی مشکلات حل کرنے کیلئے کے الیکٹرک کو مدد فراہم کرے گی اور اگر کے الیکٹرک مسائل کے حل میں ناکام ہوئی تو ہم کے الیکٹرک کو تحویل میں لے سکتے ہیں۔

اسد عمر کا کہنا تھا کہ اگلے سال گرمیوں سے قبل کراچی کے لئے ساڑھے پانچ سو میگاواٹ بجلی کا اضافہ کیا جائے گا اور 2023 سے قبل ہم کراچی کو 2150 میگاواٹ بجلی سپلائی میں اضافہ کیا جائے گا۔

وفاقی وزیر کا کہنا تھا کہ حکومت صوبائی حکومت کے ساتھ مل کر کراچی کا بجلی کا مسئلہ اور دیگر مسائل حل کریں گے کیونکہ حکومت اپنے اتحادیوں کے ساتھ ملکر تمام مسائل کر حل۔کرنے پر یقین رکھتی ہے۔

جب تک کراچی کو آئینی حق نہیں دیا جائے گا تب تک کراچی کے مسائل حل نہی ہوں گے، اس حوالے سے سپریم کورٹ میں کیس زیر التوا ہے، چیف جسٹس اس کیس کو جلد سماعت کیلئے مقرر کریں۔

انہوں نے بتایا کہ کراچی میں بن قاسم پلانٹ کی ٹرپننگ کے باعث لوڈشیڈنگ ہورہی ہے اور اگلے تین دن تک بن قاسم پلانٹ بجلی کی پیداوار شروع کر دے گا۔