ایل او سی پر جنگ بندی کی خلاف ورزی پر پاکستان میں بھارتی سینیئر سفارتکار کو ایک بار پھر دفترخارجہ طلب کرلیا گیا ہے۔

اس حوالے سے ترجمان دفتر خارجہ کا کہنا ہے کہ بھارتی قابض افواج کی طرف سے لائن آف کنٹرول کی خلاف ورزیوں پر سخت احتجاج کیا گیا ہے کیونکہ بھارتی قابض افواج کی طرف سے 20 جولائی کو جنگ بندی کی خلاف ورزی کی گئی۔

 ترجمان کا کہنا ہے کہ بگسر سیکٹر پر بھارتی فائرنگ سے 20 سالہ معین اختر ولد محمد اختر شدید زخمی ہوا تھا۔

ڈاکٹر عائشہ فاروقی نے بتایا کہ بھارتی فورسز لائن آف کنٹرول، ورکنگ باؤنڈری پر مسلسل نہتی شہری آبادی کو نشانہ بنا رہی ہیں جبکہ رواں برس بھارت نے  1732 بار جنگ بندی کی خلاف ورزیاں بھی کی گئی۔

انہوں نے کہا کہ  رواں برس بھارتی اشتعال انگیزیوں میں 14 معصوم شہری شہید اور 134 زخمی ہوئے۔

ترجمان نے واضح کیا ہے کہ بھارت کا معصوم شہریوں کو جان بوجھ کر نشانہ بنانا قابل مذمت ہے اور بھارت کی اشتعال انگزیزی خطے میں امن و سلامتی کے لیے خطرہ ہے لیکن بھارت ان حرکتوں سے مقبوضہ کشمیر کی صورتحال سے دنیا کی توجہ نہیں ہٹا سکتا ہے اس لئے بھارت اقوام متحدہ سلامتی کونسل کی قراردادوں پر عمل درآمد یقینی بنائے۔

ترجمان دفتر خارجہ نے مزید کہا کہ بھارت 2003ء کے فائر بندی انتظام کی پاسداری کرے کیونکہ نہتے شہریوں کو نشانہ بنانا عالمی قوانین، اقدار کے منافی ہے اورر اقوام متحدہ فوجی مبصر مشن کو ایل او سی پر کام کرنے دیا جائے۔