گورنرپنجاب چوہدری محمد سرور نے کہا ہے کہ عام انتخابات 2023میں ہی ہوں گے اپوزیشن انتظار کر ے۔

تفصیلات کے مطابق گورنرپنجاب چوہدری محمد سرور سے ق لیگ کے ایم این اے چوہدری مونس الٰہی کی ملاقات ہوئی۔

 گور نر ہائوس میں ہونیوالی ملاقات میں سیاسی صورتحال سمیت دیگر امور پربات چیت کی گئی جبکہ تحریک انصاف اور مسلم لیگ ق کے اتحادی تعلقات کو مزید مضبوط بنانے پر اتفاق کیا گیا۔

ملاقات میں چوہدری محمد سرور نے کہا کہ اتحادیوں کے ساتھ معاملات احسن انداز سے چل رہے ہیں جبکہ ق لیگ سمیت اتحادی جماعتیں حکومت کومکمل سپورٹ کر رہی ہے۔

گورنر چوہدری محمد سرور نے مزید کہا کہ اپوزیشن کا حکومتی اتحاد میں دراڑیں دیکھنے کا خواب کبھی پورانہیں ہوگا جبکہ عام انتخابات بھی 2023میں ہی ہوں گے اپوزیشن انتظار کرے۔

گورنرپنجاب کا کرونا وائرس کے متاثرین کو راشن دینے کا منصوبہ

ملاقات میں چوہدری مونس الٰہی نے کہا کہ مسلم لیگ ق عوامی ریلیف اور خدمت پریقین رکھتی ہے، چاہتے ہیں اتحادی حکومت احسن انداز سے عوامی مسائل کو حل کرے۔

ق لیگ کے ایم این اے چوہدری مونس الٰہی نے مزید کہا کہ عوامی مفادات کے تحفظ کیلئے ہر فورم پر اپنا کردار ادا کرتے رہیں گے۔

واضح رہے اس سے قبل بھی گورنر پنجاب چوہدری محمد سرور سے مسلم لیگ ق کےرہنما چوہدری مونس الٰہی نے ملاقات کی تھی جس میں دونوں جماعتوں کے تعلقات سمیت دیگر امور پر بات چیت کی تھی۔

اس موقع پر گورنر پنجاب چوہدری محمد سرور نے کہا تھا کہ حکومت اور اتحادی ایک دوسرے کے ساتھ کھڑے ہیں، اپوزیشن ہر روز حکومت کے خاتمے کا خواب دیکھتی ہے۔

گورنر پنجاب نے مزید کہا تھا کہ حکومت اور ہم مل کر ملک کو مسائل سے نجات دلائیں گے، ہم عوام کی خدمت پر یقین رکھتے ہیں اور حکومت کے ساتھ ہیں۔