کراچی ٹریفک پولیس افسر نے ایک نئی روایت قائم کی ہے جس میں ٹریفک پولس افسر نے ایک سائیکل والے کا چلان کردیا ہے۔

تفصیلات کے مطابق کراچی میں کلفٹن پر ایک ٹریفک پولیس افسر نے سائیکل سوار کا 500 کا چالان کردیا ہے۔

ٹریفک پولیس افسر نے غریب سائیکل سوار کا ون وے کی خلاف ورزی پر 500 روپے کا چالان کیا ہے۔

غریب سائیکل سوار کا نام محمد شاہد اقبال بتایا جارہا ہے جو کہ سائیکل پر پھیری لگا کر مختلف اقسام کی چیزیں فروخت کرتاہے۔

اس ضمن میں اس شخص کا کہنا ہے کہ پولیس کی جانب سے ون وے کی خلاف ورزی پر جرمانہ عائد کیا گیا ہے لیکن میں ایک غریب انسان ہوں جس کے پاس کھانے کے لئے پیسے نہیں ہیں تو چلان کے لئے 500 روپے کہاں سے لاؤ گا۔

سائیکل سوار کا کہنا ہے کہ اس نے ٹریفک پولیس افسر سے چالان کی پرچی وصول نہیں کی، کلفٹن ٹریفک سیکشن کا مؤقف ہے کہ جرمانہ ٹریفک پولیس افسر نے خود ادا کیا اور سائیکل سوار کو وارننگ کے بعد جانے دیا۔

سائیکل سوار کے ٹریفک چالان کی ویڈیو وائرل ہوگئی ہے جس میں پولیس افسر چالان کرتے ہوئے خود ویڈیو بنارہا ہے اور سائیکل سوار چالان کی پرچی لینے سے انکار کررہا ہے۔

ویڈیو وائرل ہوتے ہی ڈی آئی جی ٹریفک نے واقعے پر نوٹس لے لیا اور ایس پی ٹریفک سٹی کو انکوائری کے احکامات دے دیئے گئے ہیں اور کہا کہ ٹریفک اہلکار چالان کرتے وقت لوگوں کی معاشی پریشانیاں بھی ذہن میں رکھیں۔