بھارتی پولیس نے ماسک نہ پہننے پر ایک بکرے کو گرفتار کرلیا۔

غیر ملکی خبر رساں ادارے کی رپورٹ کے مطابق ریاست اترپردیش کے شہر کانپور میں بھارتی پولیس نے انوکھی کارروائی کرتے ہوئےایک بے زبان جانور کو حراست میں لےلیا۔

رپورٹ کے مطابق کانپور پولیس اہلکار معمول کے گشت پر تھے کہ انہیں سڑک پر ایک بکرا گھومتا ہوا نظر آیا جسے پولیس اہلکاروں نے فیس ماسک نہ پہننے کے جرم میں گرفتار کرکے تھانے منتقل کردیا۔

بکرے کے مالک نے تھانے پہنچ کر رہائی کی استدعا کی تو پولیس نے اس شرط پر بکرے کو رہا کیا کہ اسے سڑک پر ماسک کے بغیر نہیں چھوڑا جائے گا۔

غیر ملکی میڈیا کا کہنا ہے کہ بکرے کی گرفتاری سے متعلق خبر سوشل میڈیا پر عام ہوئی تو شہریوں نے کانپور پولیس کو تنقید کا نشانہ بنایا اور احتجاج بھی کیا ۔

 پولیس نے اپنا موقف تبدیل کرتے ہوئے کہا کہ بکرے کے مالک کو گرفتار کرنا چاہ رہے تھے جس نے فیس ماسک نہیں پہنا ہوا تھا اور اسی کی گرفتاری کےلیے بکرے کو تھانے لائے تھے۔

بھارت میں ہر شخص پر ماسک پہننا لازم ہے اور خلاف ورزی پر جرمانہ بھی کیا جاتا ہے لیکن جانوروں پر یہ پابندی لاگو نہیں۔

بھارت میں ماسک نہ پہننے پر 2 سال قید اور ایک لاکھ جرمانہ

واضح رہے کہ بھارت میں ماسک نہ پہننے پر 2 سال قید اور ایک لاکھ جرمانے کی منظوری دیدی گئی تھی۔

بھارتی میڈیا کے مطابق ریاست جھارکھنڈ میں شہریوں کے لیے ماسک پہننے کی پابندی لازمی قرار دیدی گئی تھی جس کی خلاف ورزی پر دو سال قید اور 1 لاکھ روپے جرمانہ ہوگا۔

جھاڑ کھنڈ کے وزیراعلٰی ہیمنت سورین نے متعدی وبائی بل کی منظوری سے آگاہ کرتے ہوئے عوام سے اپیل کی تھی کہ ماسک پہنے بغیر گھر سے باہر نہ نکلیں۔

وزیراعلٰی جھاڑ کھنڈ  ہیمنت سورین نے مزید کہا تھا کہ جھاڑ کھنڈ اسمبلی کے سیکریٹریٹ کو بھی تین دن کے لیے بند کردیا گیا ہے، یہ ایک سخت فیصلہ ہے لیکن عوام کی جانوں کی حفاظت کے لیے کڑوے گھونٹ بھی پینا پڑتے ہیں۔