گورنر پنجاب چوہدری محمد سرور نے کہا ہے کہ ملک کی خوشحالی وزیرِ اعظم عمران خان کا مشن ہے۔

تفصیلات کے مطابق گورنر پنجاب چوہدری محمد سرور نے میڈیا سے گفتگو کرتے ہوئے کہا کہ حکومت ملکی اداروں کو سیاسی مداخلت سے پاک کرنے پر کام کر رہی ہے۔

گورنر پنجاب نے کہا کہ وزیرِ اعظم عمران خان کا حکومت میں آنے کا کوئی ذاتی ایجنڈا نہیں بلکہ ملک کی تعمیر و ترقی وزیرِ اعظم کا مشن ہے جس پر وہ کام کر رہے ہیں۔

چوہدری محمد سرور نے یہ بھی کہا کہ ملک کی تاریخ میں پہلی بار کسی حکومت نے مافیا کے خلاف ایکشن لیا جبکہ ہم اداروں کو سیاسی مداخلت سے پاک اور مضبوط کرنا چاہتے ہیں۔

حالات میں مزید بہتری کے لئے عوام کا تعاون ضروری ہے، گورنر پنجاب

گورنر پنجاب کا کہنا تھا کہ عیدالاضحیٰ اور محرم کے دوران سماجی فاصلے اور ایس او پیز کی پابندی ضروری ہے کیونکہ اگر سماجی فاصلے کی پابندی نہ کی گئی تو عیدالاضحیٰ پر کورونا وائرس قابو سے باہرہوسکتا ہے۔

چوہدری محمد سرور کا یہ بھی کہنا تھا کہ مویشی منڈیوں میں ایس او پیز کے سختی سے نفاذ میں وقت لگے گا۔

گورنر پنجاب چوہدری محمد سرور کا مزید کہنا تھا کہ نیشنل ڈیزاسٹر مینجمنٹ اتھارٹی (این ڈی ایم اے) کا کورونا وائرس کی روک تھام کیلئے کردار تاریخ یاد رکھا جائے گا کیونکہ کورونا وائرس کے خلاف این ڈی ایم اے کا کردار قابلِ تعریف ہے۔