وزیراعلیٰ پنجاب سردار عثمان بزدار نے کہا ہے کہ شہریوں کو ان کی دہلیز پر بنیادی سہولتیں فراہم کرنا ہماری حکومت کا عزم ہے۔

تفصیلات کے مطابق وزیراعلیٰ پنجاب سردار عثمان بزدار کی زیرصدارت اجلاس ہوا ، جس میں لاہور ڈویلپمنٹ اتھارٹی کی کارکردگی اور دائرہ کار کے حوالے سے امور کا جائزہ لیا گیا

اجلاس میں وزیراعلیٰ عثمان بزدار نے لاہور ڈویژن کا ماسٹر پلان سے متعلقہ امور جلد طے کرنے کی ہدایت کی اور کہا کہ لاہور کے شہریوں کی سہولت کیلئے نئے منصوبے شروع کر رہے ہیں

وزیراعلیٰ پنجاب نے کہا کہ ایل ڈی اے کی جانب سے اپارٹمنٹس کی تعمیر کا منصوبہ انتہائی اہمیت کا حامل ہے اور اس منصوبے سے کم آمدن والے طبقات کو اپنی چھت ملے گی۔

عثمان بزدار نے یہ بھی کہا کہ لاہور میں ہائی رائز بلڈنگز تعمیر کرنے کی اجازت دے دی ہےجبکہ ایل ڈی اے میں ریفارمز کرکے اسے پبلک فرینڈلی ادارہ بنایا گیا ہے۔

مویشی منڈیوں میں ایس او پیز کی خلاف ورزی قطعاً برداشت نہیں کی جائے گی،عثمان بزدار

سردار عثمان بزدار کا کہنا تھا کہ ایل ڈی اے کے دائرہ کار کا از سر نو جائزہ لے کر جلد حتمی سفارشات پیش کی جائیں جبکہ ایل ڈی اے میں اصلاحات کرکے عوام کو سہولت فراہم کی گئی ہے۔

وزیراعلیٰ پنجاب سردار عثمان بزدار کا مزید کہنا تھا کہ ایل ڈی اے کے دائرہ کار کا از سر نو تعین کرنے کیلئے ننکانہ صاحب، قصور اور شیخوپورہ کے اراکین قومی و صوبائی اسمبلی کو اعتماد میں لیا جائے گا جبکہ اس ضمن میں فیصلہ سٹیک ہولڈرز کی مشاورت سے کیا جائے گا اور وہ فیصلہ کریں گے جس سے عوام کو سہولت ملے۔

اجلاس میں صوبائی وزیر قانون راجہ بشارت، وائس چیئرمین ایل ڈی اے شیخ محمد عمران، چیف سیکرٹری، پرنسپل سیکرٹری وزیراعلیٰ، سیکرٹری ہاؤسنگ، ڈی جی ایل ڈی اے اور متعلقہ حکام نے شرکت کی ۔