یمن کے حوثی باغیوں کی جانب سے سعودی عرب کے ابہا ائیرپورٹ پر ڈرون حملے کیے گئے جسے سعودی اتحادی فوج نے ناکام بنادیا۔

عرب میڈیا کے   مطابق حوثی باغیوں نے سعودی عرب کے جنوبی شہر ابہا کے ائیرپورٹ پر دو ڈرون حملے کیے۔

باغیوں کا کہناہے کہ انہوں نے جمعرات کے روز ابہا ائیرپورٹ کے مانیٹرنگ ٹاور اور سعودی عرب کے دیگر حساس مقامات کو نشانہ بنایا جس کے باعث فضائی آپریشن متاثر ہوا۔

 دوسری جانب  سعودی اتحادی فوج کے ترجمان نے حوثی باغیوں کے حملوں کی تصدیق کرتے ہوئے بتایا کہ باغیوں کے ڈرون حملوں کو فوری ناکام بناتے ہوئے ڈرون کو گرادیا گیا۔

اتحادی فوج کا کہنا ہےکہ حوثی باغیوں کی جانب سے تین جولائی کو ابہا ائیرپورٹ پر کیے گئے حملوں میں تین عام شہری زخمی ہوئے جب کہ 12 جون کو اسی ائیرپورٹ پر میزائل حملے میں 26 عام شہری زخمی ہوئے تھے، اس کے علاوہ 23 جون کے حملے میں ایک شامی شہری جاں بحق ور 21 عام شہری زخمی ہوئے۔

میڈیا رپورٹس کے مطابق حوثی باغیوں کے حملوں کے جواب میں سعودی اتحادی افواج نے صنعا سمیت دیگر علاقوں میں باغیوں کے ٹھکانوں کو نشانہ بنایا۔

واضح  رہے کہ اس  سے قبل رواں ہفتے بھی حوثی باغیوں کی جانب سے ابہا اور نجران شہر کے سویلین ائیرپورٹس سمیت کنگ خالد ائیربیس کو بھی ڈرون حملوں کا نشانہ بنایا گیا تھا۔

 یاد رہے   کہ  یمن میں   سعودی عرب  اور حوثی باغیوں کے درمیان جاری  تنازعہ  میں      4سال کے دوران 10ہزار سے زائد افراد ہلاک ہوچکے ہیں۔