معاون خصوصی ڈاکٹر فردوس عاشق اعوان نے کہا ہے کہ حکومت اپنے مفادات کے لئے قومی مفاد کا سمجھوتا نہیں کریگی۔

معاون خصوصی فردوس عاشق اعوان نے اپنے ویڈیو پیغام میں کہا ہے کہ نئے پاکستان میں قانون سب کے لیے یکساں ہیں، قوم نہیں چاہتی بدعنوان عناصر سے کسی قسم کا سمجھوتہ کریں جبکہ کشمیریوں کے حق خودارادیت کے لیے اصولی موقف پر قائم رہیں گے۔

انکا مزید کہنا تھا کہ بلاول جان لیں کہ سندھ میں ان کی کرپشن کی داستانیں عام ہیں،  بلاول کشمیر کے لیے جدوجہد کو ابو، پھپھو بچاؤ مہم سے نہ جوڑیں اور مسئلہ کشمیر کو سیاست کی نذر نہ کیا جائے  کیونکہ کشمیر کا محاذ ہمارے دل کے قریب ہے۔

ڈاکٹر فردوس عاشق اعوان نے کشمیر کے معاملے پر پاکستان کی سیاسی جماعتوں کو ہدایت کرتے ہوئے کہا کہ کشمیریوں کے ساتھ شانہ بشانہ کھڑے ہوکر لائحہ عمل تیار کریں جبکہ چین کی جانب سے بھی پاکستان کے موقف کی بھرپور حمایت کی گئی ہے اور چین نے ہندوستان کےموقف کو بھی مسترد کردیا گیا ہے۔

اس سے قبل پیپلز پارٹی کے چیئرمین بلاول بھٹو نے پریس کانفرنس کرتے ہوئے کہا ہمیں وہ سب کچھ کرنا ہوگا جس سے کشمیریوں کوسپورٹ ملے، ہم سب کوملک کردنیاکوایک واضح اورٹھوس پیغام دیناچاہیے۔

بلا ول کا مزید کہنا تھا کہ مودی نے کشمیر اور بھارت میں رہنے والے انسانوں کے حقوق کو پامال کر رہا ہے، مودی نے کشمیر میں تاریخی حملہ کیا ہے اس وقت ہمیں اٹھنا چاہئیے تھا، کشمیر کے معاملہ پر بولنے کی بجائے ن لیگ اور پیپلزپارٹی سے انتقام لیا جا رہا ہے، تین نسلوں سے لڑائی لڑ رہے ہیں کشمیری بےنظیر کو یاد کرتے ہیں۔