بائیوسیکیور ببل کی خلاف ورزی کرنے پر قومی کرکٹ ٹیم کے سینئر کھلاڑی   محمد حفیظ کو آئسولیشن میں منتقل کردیا گیا۔

پاکستان کرکٹ بورڈ ( پی سی بی )  جانب سے محمد حفیظ کے بائیو سیکیور ببل کی خلاف ورزی سے متعلق اعلامیہ  جاری کردیا گیا۔

اعلامیے میں کہا گیا کہ  محمد حفیظ  آج صبح ٹیم ہوٹل سے متصل گولف کورس گئے  جوکہ بائیو سیکیور ببل کا حصہ ہے۔اس دوران انہوں نے  ایک عام فرد کے ساتھ تصویر بنوائی اور بعدازاں اسے اپنے سوشل میڈیا اکاؤنٹ پر جاری کردیا۔

Met an inspirational Young lady today morning at Golf course. She is 90+ & & living her life healthy & happily.Good healthy routine 😍👍🏼 pic.twitter.com/3tsWSkXl1E

Advertisement

— Mohammad Hafeez (@MHafeez22) August 12, 2020

جیسا کہ تصویر میں واضح ہے کہ محمد حفیظ نے 2 میٹر پر مشتمل سماجی فاصلے کے پروٹوکول کی خلاف ورزی کی ہے،لہٰذا ٹیم منیجمنٹ نے، ٹیم ڈاکٹر سے مشاورت کے بعد، محمد حفیظ کو اس وقت تک آئسولیشن میں بھیجنے کا فیصلہ کیا ہے جب تک کہ ان کا کورونا ٹیسٹ منفی نہیں آجاتا۔

محمد حفیظ کا کورونا ٹیسٹ بدھ کی سہ پہر لیا گیا، جس کا رزلٹ جمعرات کو متوقع ہے۔

اعلامیے میں مزید کہا گیا کہ محمد حفیظ کو آئسولیشن میں بھیجنے کا فیصلہ ان کے اور ان کے اردگرد موجود تمام افراد کی صحت اور حفاظت کو یقینی بنانے  کی غرض سے کیا گیا ہے۔

ٹیم منیجمنٹ کا ماننا ہے کہ یہ غلطی غیردانستہ تھی تاہم یہ سب کو بائیو سیکیور ماحول  جوکہ ان کی صحت اور حفاظت کو یقینی بنانے  کے لیے بنایاگیا ہے، کی گائیڈ لائنز کی پیروی کرنے کی ایک اچھی یاد دہانی ہے۔

ٹیم منیجمنٹ نے انگلینڈ اینڈ ویلز کرکٹ بورڈ کو اپنے فیصلے  سے متعلق آگاہ کردیا ہے۔

واضح رہے کہ  محمد حفیظ انگلینڈ کے خلاف تین ٹیسٹ میچوں پر مشتمل سیریز کے لیے شارٹ لسٹ کیے گئے 20 کھلاڑیوں میں شامل نہیں ہیں۔