سندھ کے میٹرک اور انٹرمیڈیٹ کے 8 لاکھ طلباء کو بغیر امتحانات کے پروموٹ کرنے کے لئے قانون سازی کر دی گئی۔

تفصیلات کے مطابق  سندھ اسمبلی میں طلباءکو بغیر امتحانات پروموٹ کرنے کا بل کثرت رائے سے منظور ہونے کے بعد گورنر سندھ عمران اسماعیل نے بل پر دستخط کر دیئے۔

گورنر سندھ کے دستخط کرنے کے بعد سندھ بورڈ آف ٹیکنیکل ایجوکیشن، سندھ بورڈ آف انٹرمیڈیٹ اینڈ سیکنڈری ایجوکیشن کے قوانین میں ترمیم کر دی گئی۔

قوانین میں ترمیم ایکٹ کے تحت  تعلیمی بورڈز کو اختیار ہے کہ طلباء کو بغیر کسی امتحان کے پروموٹ کر سکتا ہے۔طلباء کو بغیر کسی امتحان کے پروموٹ وباء یا عالمی وباء کی صورت میں ایمرجنسی نافذ پر کیا جا سکتا ہے۔

طلباء کا پروموشن حکومت کی جانب سے جاری کر دہ پالیسی کے تحت ہوگا۔ ترمیمی بل یکم جون سے نافذ العمل سمجھا جائے گا۔

یاد رہے کہ محکمہ تعلیم کی اسٹیرنگ کمیٹی کی ذیلی کمیٹی نے 16 مئی کو تجویز دی تھی کہ اسکول، کالجز کے امتحانات عالمی وباء کی صورت میں ممکن نہیں۔ محکمہ تعلیم کی اسٹیرنگ کمیٹی کی ذیلی کمیٹی نے حکومت کی پالیسی کے تحت پروموٹ کرنے کی تجویز دی تھی۔

تعلیمی بورڈز کے موجودہ قانون میں بغیر امتحانات کے پروموٹ کرنے کی گنجائش نہ ہونے پر ترمیم کی گئی۔