وزیراعلٰی سندھ مراد علی شاہ نے کہا کشمیر اور پاکستان کے لیے وفاقی حکومت کی پالیسی کی حمایت کریں گے۔

تفصیلات کے مطابق کراچی میں وزیراعلٰی سندھ کی قیادت میں یکجہتی کشمیرکی ریلی نکالی گئی، ریلی سے خطاب میں مراد علی شاہ نے کہا کہ کشمیری کی آزادی تک جنگ رہے گی۔

وزیراعلیٰ سندھ نے ریلی سے خطاب کرتے ہوئے کہا کہ آج کشمیر کے لیے پورا پاکستان اکھٹا ہوا ہے، تمام جماعتیں پیپلزپارٹی کے ساتھ ہیں۔

مراد علی شاہ نے کہا کہ سیاسی جماعتوں نے ریلی میں شریک ہوکر ثابت کردیا کہ کشمیر اور پاکستان کے لیے سب ایک ہیں۔

وزیراعلیٰ سندھ کا کہنا تھا کہ مودی نے انتخابات میں کامیابی کے بعد کشمیریوں پر ظلم کے پہاڑ توڑے،پاکستانی اپنے کشمیری بھائیوں کے ساتھ کھڑے ہیں۔

وزیراعلٰی مراد علی شاہ کا کہنا تھا کہ ملکی سلامتی اور کشمیریوں کے حق خود ارادیت کے لیے جدوجہد جاری رکھیں گے۔

وزیراعلٰی  کا یہ بھی کہنا تھا کہ ہندوستان کو بتانا چاہتا ہوں کہ اگر ہم پر جارحیت مسلط کرنے کی کوشش کی تو منہ توڑ جواب دیں گے ۔

مراد علی شاہ نے کہا کہ وفاقی حکومت کی مایوس باتوں کے باوجود وزیراعظم سے کہتا ہوں کہ بھارت سے دوٹوک بات کریں۔

وزیراعلیٰ سندھ نے مزید کہا کہ شہید بھٹو نے کشمیریوں کی آواز عالمی فورمز تک پہنچائی اور کشمیر کا مقدمہ لڑا ، مجھے  بلاول بھٹو نے ہدایت کی تھی بطور وزیر اعلیٰ ریلی کی قیادت کروں اور تمام  جماعتوں کو ریلی میں شرکت کی  دعوت دوں،میں پیپلزپارٹی کی طرف سے تمام جماعتوں کا ریلی میں شرکت پر شکریہ ادا کرتا ہوں ۔

یاد رہے کہ ریلی میں پیپلزپارٹی کے رہنماوں اور کارکنوں کے علاوہ اے این پی، جماعت اسلامی، پی ایس پی، مسلم لیگ ق کے رہنماوں نے بھی بڑی تعداد میں شرکت کی۔

ریلی کے شرکاء نے یکجہتی کشمیر ریلی میں پیپلزسیکرٹریٹ سے ایمپریس مارکیٹ تک مارچ کیا اور کشمیری بنے گا پاکستان کے نعرے بھی لگوئے۔