چودھری شجاعت حسین، چودھری پرویزالٰہی اور طارق بشیر چیمہ سے سعودی سفیر نواف سعید المالکی کی ملاقات ہوئی ہے۔

ملاقات کے دوران سعودی سفیر نے چودھری صاحبان کو پاکستان کے یوم آزادی پر مبارکباد پیش کی اور کہا ہے کہ سعودی عرب ہر مشکل وقت میں پاکستان کے ساتھ کھڑا ہے۔

نواف سعید المالکی نے کہا ہے کہ آپ کے سعودی عرب کے بارے میں نیک اور اچھے خیالات جان کر خوشی ہوئی ہے اور کورونا کے ایس او پیز کو مدنظر رکھتے ہوئے جلد عمرہ کی سعادت حاصل کرنے والے زائرین کو سعودی عرب آنے کی اجازت مل جائے گی۔

دوسری جانب ملاقات کے دوران چوہدری برادران کا کہنا تھا کہ سعودی عرب اور پاکستان اسلامی بھائی چارے کے بندھن میں بندھے ہیں، دنیا کی کوئی طاقت اس بھائی چارے کو کم نہیں کر سکتی ہے۔

انہوں نے کہا کہ سعودی عرب سے محبت اور عقیدت میں روز بروز اضافہ ہوتا جا رہا ہے۔

ان کا مزید کہنا تھا کہ شاہ سلمان اور کراؤن پرنس محمد بن سلمان کے دنیا میں پاکستان کے سفیر ہونے پر مشکور ہیں جبکہ شاہ سلمان اور محمد بن سلمان پاکستان کے مسائل سے آگاہ ہیں۔

چوہدری برادران کا کہنا تھا کہ پاکستانیوں کے دل مکہ مدینہ میں دھڑکتے ہیں۔

ملاقات میں ملکی سیاسی صورتحال اور باہمی دلچسپی کے امور پر تبادلہ خیال کیا گیا اور مزید کہا ہے کہ وبائی امراض پر کافی حد تک قابو پا لیا گیا ہے لیکن ابھی بھی محرم الحرام میں ایس او پیز کا خاص خیال رکھنے کی ضرورت ہے۔

ملاقات میں مونس الٰہی، شافع حسین اور راسخ الٰہی بھی موجود تھے۔