وزیر توانائی سندھ امتیازشیخ کی جانب سے صوبے میں بجلی بحران کی ذمہ داری وفاق پر ڈال دی گئی ہے۔

تفصیلات کے مطابق نیوز بریفنگ میں صوبائی وزیر توانائی سندھ امتیازشیخ نے کہا بیٹھ کر مسئلہ حل کرنے کی پیشکش کی لیکن وفاق ملنے کو تیار نہیں ہے۔

انہوں نے کہا ہے کہ کے الیکٹرک، حیسکو اور سیپکو کو وائسرائے بنا کر بھیجا گیا ہے کیونکہ اسلام آباد میں بیٹھ کر سندھ کو لاوارث صوبہ سمجھا جاتا ہے۔

امتیاز شیخ نے کہا ہے کہ لوڈشیڈنگ سے بڑے پیمانے پر لوگوں کی زندگیاں متاثر ہورہی ہیں کیونکہ اٹھارہ اٹھارہ گھنٹے لوڈ شیدنگ ہورہی ہے۔

انہوں نے کہا ہے کہ ہم نے کئی بار خط بھی لکھے ہیں اور وزیراعلیٰ سندھ نے بھی کئی بار یہ مسئلہ اٹھایا ہے لیکن وفاق کے وزیر توانائی کے کان پر اس معاملے پر جوں تک نہیں رینگتی ہے۔

ان کا کہنا تھا کہاس طرح سندھ کے لوگوں کو تنگ کیا جارہا ہے اور سندھ کے لوگوں کو دیوار سے لگایا جا رہا ہے۔

صوبائی وزیر نے کہا ہے کہ سپریم کورٹ نے کراچی میں ہلاکتوں کا نوٹس لیا تھا اور چیف جسٹس نے احکامات بھی دئیے تھے کہ اب سے جو بھی ہلاکت ہو گی اس پر بجلی کی کمپنی  کے سربراہ پر ایف آئی آر کٹے گی اور اب ہم بھی اس پر عمل کرنے جارہے ہیں اور اس معاملے پر قانون ڈیپارٹمنٹ سے رابطے میں ہیں جس کے بعد حیسکو، سپیکو کہ کے سربراہان پر ایف آئی آر کٹی گی۔