صوبائی وزیر قانون پنجاب محمد بشارت راجہ نے کہا ہے کہ جلوسوں اور مجالس کے اردگرد سیکیورٹی چیک میں غفلت نہ برتی جائے۔

تفصیلات کے مطابق صوبائی وزیر قانون پنجاب محمد بشارت راجہ کی زیر صدارت کمشنر آفس راولپنڈی میں محرم الحرام کی سیکیورٹی کا جائزہ اجلاس ہوا جس میں کمشنر ،آرپی او اور دیگر افسران کی کیے گئے حفاظتی انتظامات پر بریفنگ دی گئی۔

اجلاس میں بریفنگ کے دوران کہا گیا کہ محرم الحرام کو پرامن طور پر گزرنے کے لیے تمام تر انتظامات کو حتمی شکل دے دی گئی ہے۔

اجلاس کی صدارت کرتے ہوئے صوبائی وزیر قانون پنجاب محمد بشارت راجہ نے کہا کہ محرم الحرام کے دوران امن و امان کی فضا کو برقرار رکھنے کے لیے تمام پہلوؤں پر کڑی نظر رکھی جائے جبکہ جلوسوں اور مجالس کے داخلی راستوں پر ماسک اور سینیٹائزر کا استعمال یقینی بنایا جائے۔

بشارت راجہ نے یہ بھی کہا کہ محرم کے جلوسوں اور مجالس کے مقررہ اوقات کار پر ہر صورت عملدرآمد یقینی بنایا جائے جبکہ لائسنسداروں اور عزاداروں کے نمائندوں سے قریبی رابطہ رکھا جائے۔

مزید پڑھیں

پاکستان میں تمام اقلیتوں کو ہر طرح کی مذہبی آزادی حاصل ہے، راجہ بشارت 

وزیر قانون پنجاب راجہ بشارت  نے کہا ہے کہ پاکستان میں تمام...

صوبائی وزیر قانون پنجاب محمد بشارت راجہ نے مزید کہا کہ سوشل میڈیا اور دیگرذرائع ابلاغ پر مذہبی منافرت پھیلانے والوں کا سخت محاسبہ کیا جائے جبکہ تمام مکاتب کےعلماء کرام کے مابین مذہبی ہم آہنگی کے فروغ کے لیے آگاہی مہم تیز کی جائے۔

اجلاس میں کمشنر راولپنڈی ڈویژن کیپٹن (ر)محمد محمود آر پی او سہیل حبیب تاجک، ڈپٹی کمشنر راولپنڈی انوارالحق ،سی پی او احسن یونس اور متعلقہ افسران نے شرکت کی۔.