بھارت کے ضلع جودھ پور میں 11 پاکستانی  ہندوؤں کے قتل کے معاملے پر پاکستان میں بھارتی ناظم الامور  کو دفتر خارجہ طلب کرلیا گیا۔

ترجمان دفترخارجہ کے مطابق  پاکستان نے  بھارتی ناظم الامور کو دفتر خارجہ طلب کرکے 11 پاکستانی ہندوؤں کے قتل پر احتجاج  کیا اور اپنے تحفظات سے آگاہ کیا۔

بھارتی ریاست راجستھان کے شہرجودھ پور میں 9 اگست کو پاکستان سے جانے والے 11 ہندو مشکوک طور پر مارے گئے  تھے۔

 ترجمان دفتر خارجہ کا کہنا ہے کہ نئی دہلی میں پاکستانی ہائی کمیشن نے متعدد بار بھارتی حکومت سے واقعے کی تفصیلات فراہم کرنے کا مطالبہ کیا   ہےتاہم بھارتی حکومت معاملے پر ٹال مٹول سے کام لیتی رہی ہے اورٹھوس معلومات فراہم کرنے میں ناکام رہی ہے۔

ترجمان کا کہنا تھا کہ مرحوم کی بیٹی شرمتی مکھی نے اپنے والد کے قتل میں بھارتی خفیہ ایجنسی را کے ملوث ہونے کا بیان دیا ہے ۔

شرمتی مکھی کے مطابق بھارتی خفیہ ایجنسی را اس کے والد ،والدہ اور دیگر اہلخانہ کے قتل میں ملوث ہے اور پاکستان مخالف کام کرنے کے  لیے قائل کرنے میں ناکام رہی ہے ۔

ترجمان دفتر خارجہ نے بھارت سے مطالبہ کیا ہے کہ پاکستانی شہریوں کو تحفظ فراہم کیا جائے اور  پاکستانی ہائی کمیشن کو متاثرین کے بھارت میں موجود خاندان تک رسائی دی جائے ۔

ترجمان دفتر خارجہ نے یہ بھی مطالبہ کیا ہے کہ بھارت ایف آئی آر کی کاپی فراہم کرے اور پاکستانی ہائی کمیشن کے اہلکاروں کو پوسٹ مارٹم کے وقت رسائی دے۔