وزیر خارجہ  شاہ محمود قریشی نے یورپی یونین سے مقبوضہ کشمیرمیں مظالم بند کروانے کا مطالبہ کردیا۔

تفصیلات کے مطابق  پاکستان میں یورپی یونین کی سفیر اینڈرولا کامینارا  نے وزیر خارجہ شاہ محمود قریشی سے ملاقات کی ۔

ملاقات میں   افغان امن عمل، مقبوضہ کشمیر میں بھارتی مظالم اور عالمی سطح پر کورونا وبا ءپر تبادلہ خیال کیا گیا۔

وزیر خارجہ شاہ محمود قریشی نے کورونا وبائی چیلنج سے نمٹنے کے لیے یورپی یونین کے بروقت تعاون پر شکریہ ادا کیا۔

شاہ محمود قریشی کا کہنا تھا کہ ترقی پذیر ممالک کو قرضوں کی ادائیگی کی وزیراعظم عمران خان کی تجویز کی حمایت پر یورپی یونین کا کردار قابل تحسین ہے۔

انہوں نے کہا کہ پاکستان نے نہ صرف اس عالمی وبا ءپر قابو پایا بلکہ معیشت کے پہیے کو بھی رواں دواں رکھا۔پاکستان کی اسمارٹ لاک ڈاؤن پالیسی کو دنیا بھر میں سراہا جا رہا ہے۔

وزیر خارجہ نے کہا کہ توقع ہے یورپی یوین دیگر ممالک کی طرح پاکستانی شہریوں کو اپنے ممالک میں جلد داخلے  ے لیے اہل قرار دے گا۔

شاہ محمود قریشی نے یورپی یونین کی سفیر کی توجہ، مقبوضہ جموں و کشمیر میں جاری انسانی حقوق کی سنگین خلاف ورزیوں کی طرف دلاتے ہوئے کہا کہ یورپی یونین انسانی حقوق کی داعی ہونے کے ناطے بھارت پر زور دے کہ وہ مقبوضہ جموں و کشمیر میں مظالم کا سلسلہ فوری طور پر بند کرے اور بھارتی جیلوں میں مقید بے گناہ کشمیریوں کو فی الفور رہا کرے۔

دوران ملاقات وزیر خارجہ نے افغان امن عمل میں پاکستان کی مصالحانہ کوششوں، بین الافغان مذاکرات اور اس سلسلے میں اب تک ہونے والی پیش رفت کا بھی تذکرہ کیا۔