چیف آرگنائزر سیف اللہ خان نیازی نے کہا ہے کہ تحریک انصاف سندھ کو کرپشن اور ظلم کے چنگل سے چھڑوا کر تعمیر وترقی کے راستے پر گامزن کرے گی۔

تفصیلات کے مطابق مرکزی نائب صدر و سندھ میں تحریک انصاف کے پارلیمانی رہنما حلیم عادل شیخ نے چیف آرگنائزر سیف اللہ خان نیازی سے نہایت اہم ملاقات کی ہے۔

ملاقات میں مرکزی نائب صدر و سندھ میں تحریک انصاف کے پارلیمانی رہنما نے کہا کہ کرپشن اور وسائل کی لوٹ مار میں ملوث پیپلزپارٹی کی صوبائی حکومت نے سندھ اور اسکے عوام کی زندگیاں اجاڑ کررکھ دی ہیں۔

حلیم عادل شیخ نے یہ بھی کہا کہ کراچی سے کشمیر تک پورا سندھ لاقانونیت، محرومی اور حکمرانوں کی ڈاکہ زنی کا بدنما منظر پیش کررہا ہے۔

مرکزی نائب صدر و سندھ میں تحریک انصاف کے پارلیمانی رہنما حلیم عادل شیخ نے مزید کہا کہ وزیراعظم کی مقبولیت اور سندھ میں اپنے انجام سے خوفزدہ پیپلزپارٹی عوامی فلاح کی ہر کوشش سبوتاژ کرنے پر کمربستہ ہے جبکہ قیادت اجازت دے، بھرپور سیاسی حکمت عملی کے ذریعے کرپٹ ٹولے کا تعاقب کریں گے۔

سیف اللہ خان نیازی نے حلیم عادل شیخ سے ملاقات میں کہا کہ حزب اختلاف کی کل جماعتی کانفرنس سیاسی طور پر شکست خوردہ گروہ کی جانب سے عوامی توجہ منتشر کرنے کی ناکام کوشش ہے۔

چیف آرگنائزر نے کہا کہ زرداری اور ابن زرداری کی میزبانی میں اسلام آباد میں جمع ہونے والوں نے ملک و قوم کو تباہی کے دھانے پر پہنچایا ہے جبکہ قومی وسائل کی لوٹ کھسوٹ سے دولت کے انبار لگانے والوں نے محض ذاتی فائدے کیلئے ادارے تباہ کئے۔

سیف اللہ خان نیازی نے یہ بھی کہا کہ قوم وزیراعظم عمران خان کی قیادت پر مکمل یکسو اور نظام کی اصلاح کیلئے تحریک انصاف کی کاوشوں کی پشت پناہی کررہی ہے۔

چیف آرگنائزر سیف اللہ خان نیازی نے مزید کہا کہ داخلی طور پر انتشار کی کوششیں کرنے والے خودغرض سیاسی ٹولے کا ڈٹ کر مقابلہ کریں گے جبکہ کراچی کے عوام کیلئے وزیراعظم کا تاریخی پیکیج ابتداء ہے، تعمیر و فلاح کا ایجنڈا پورے سندھ تک پھیلائیں گے۔