اسٹیل ملز  کے ملازمین کی تنخواہوں کے لیے 3.8 ارب روپے کی منظوری دے دی گئی۔

تفصیلات کے مطابق مشیر خزانہ عبدالحفیظ شیخ کی زیر صدارت اقتصادی رابطہ کمیٹی کا اجلاس ہوا۔

ذرائع کا کہنا ہے کہ اجلاس میں  اسٹیل ملز ملازمین کی تنخواہوں  کے لیے 3.8 ارب روپے کی منظوری دی گئی جس سے ملازمین کو رواں مالی سال  کے لیے تنخواہوں کی ادائیگی ہو گی ۔

ذرائع کا مزید کہنا ہے کہ ای سی سی اجلاس میں اسٹیل ملز کی ادائیگیوں پر خصوصی بات چیت کی گئی۔

مشیر خزانہ نے ہدایت کی  ریٹائرمنٹ پلان کے تحت ملازمین کے بقایاجات کی تفصیلات پیش کی جائیں۔اسٹیل ملز کی ادائیگیوں کے متعلق رپورٹ آئندہ اجلاس میں پیش کی جائے گی۔

ذرائع  کا کہنا ہے کہ اجلاس میں  ٹیکسٹائل مصنوعات سے ایڈیشنل کسٹم ڈیوٹی اور ریگولیٹری ڈیوٹی ہٹانے کی منظوری بھی دی گئی۔

اس کے علاوہ  قومی ورثہ اور ثقافت ڈویژن کے اخراجات کے لیے 8 کروڑ 50 لاکھ روپے کی ضمنی گرانٹ کی منظوری دی گئی جبکہ  اسلام آباد ہائیکورٹ کے لیے 10 کروڑ 20 لاکھ روپے کی تکنیکی ضمنی گرانٹ کی منظوری بھی دی گئی۔