جہانگیر ترین کے صاحبزادے علی خان ترین نے ایف آئی اے طلبی کے حوالے سے اپنا تفصیلی جواب جمع کرا دیا۔

تفصیلات کے مطابق   جہانگیر ترین کے صاحبزادے علی خان ترین نے ایف آئی اے میں جمع کروائے گئے جواب میں کہا کہ  میں آج تک کسی بھی طرح سے جے ڈی ڈبلیوشوگر ملز، ڈیہركی شوگر ملز اور فاروقی پلپ ملز کے بورڈ آف ڈائریکٹرز یا ملز ایڈمنسٹریشن کا حصہ نہیں رہا۔

علی ترین نے جواب میں کہا کہ میری حیثیت جے ڈی ڈبلیومیں صرف ایک شیئر ہولڈر کی ہے،لہذا انتظامی معاملات میں میرے عمل دخل کا سوال ہی پیدا نہیں ہوتا۔

انہوں نے مزید کہا کہ  ان کمپنیز کے مابین ہونے والے کاروباری فیصلوں کے متعلق مجھ سے پوچھ گچھ کرنا مکمل طور پر غیر منطقی بات ہے۔ زراعت کے شعبہ میں کیش ٹرانزیکشنز معمول کا حصہ ہیں۔

علی ترین نے کہا کہ  بطور سی ای او علی ترین فارمز اور جے کے ڈیریز  ،میں یہ بات مکمل یقین سے کہتا ہوں کہ دونوں کمپنیز کارپوریٹ گورننس کے بہترین معیار کو مد نظر رکھتے ہوئے کیش ڈپازٹس اور دیگر ٹرانزیکشنز کے لیے تمام تر کاروباری قوانین کی پاسداری یقینی بناتی ہیں ۔

انہوں نے کہا کہ  مجھ سے پوچھے گئے سوالات میں جن ٹرانزیکشنز کو بنیاد بنایا گیا ہے وہ ٹرانزیکشنز کاروبار کی دنیا میں معمول کا حصہ ہیں ۔  میری معلومات کے مطابق ان ٹرانزیکشنز سے کوئی بھی ڈائریکٹر /شیئر ہولڈر/اسٹیک ہولڈر بلواسطہ یا بلا واسطہ متاثر نہیں ہوا۔

علی ترین نے کہا کہ میرے خاندان  جے ڈی ڈبلیو اور دیگر بزنسز کے خلاف جاری انکوائری فوری طور پر ختم کی  جائے۔