وزیراعلیٰ پنجاب سردار عثمان بزدار نے کہا ہے کہ نئی سرمایہ کاری سے روزگار کے بے پناہ مواقع پیدا ہوں گے۔

تفصیلات کے مطابق وزیراعلیٰ پنجاب سردار عثمان بزدار کی زیرصدارت اعلیٰ سطح کا اجلاس ہوا جس میں بزدار حکومت نے پنجاب میں اربوں روپے کی سرمایہ کاری کیلئے بڑا اقدام اٹھاتے ہوئے غیر استعمال شدہ مائننگ لیز کے حوالے سے قواعدو ضوابط میں ضروری رد و بدل کا فیصلہ کرلیا ہے۔

وزیراعلیٰ پنجاب عثمان بزدار نے این او سی کے اجراء کے حوالے سے ہونے والی پیش رفت پر اطمینان کا اظہار کیا جبکہ محکمہ صنعت اور دیگر متعلقہ محکموں کی کارکردگی کو سراہا۔

اجلاس میں وزیراعلیٰ پنجاب کو بریفنگ کے دوران بتایا گیا کہ پنجاب حکومت کو نئی سیمنٹ پلانٹ لگانے کیلئے 23 درخواستیں موصول ہوئی ہیں جبکہ 5سیمنٹ پلانٹ لگانے کی درخواستوں پر این او سی اگلے ماہ کے شروع میں جاری کر دیئے جائیں گے۔

بریفنگ کے دوران مزید بتایا گیا کہ دیگر درخواستوں پر بھی فوری طور پر ضروری کارروائی شروع کر دی گئی ہے جبکہ ایک سیمنٹ پلانٹ پر تقریباً 30 سے 40 ارب روپے لاگت آتی ہے۔

اجلاس کی صدارت کرتے ہوئے وزیراعلیٰ پنجاب سردار عثمان بزدار نے کہا کہ این او سی جاری کرنے کے حوالے سے پراسیس کو مزید تیز کیا جائے، کسی بھی محکمے میں این او سی کے اجراء میں تاخیر کسی صورت برداشت نہیں کروں گا۔

وزیراعلیٰ پنجاب نے کہا کہ سرمایہ کاروں کی آسانی کیلئے قواعد و ضوابط کو سہل بنایا جائے، سرمایہ کاروں کیلئے ہر طرح کی آسانیاں پیدا کریں گے۔

سردار عثمان بزدار نے یہ بھی کہا کہ کمیٹی این او سی کے اجراء کے حوالے سے تمام پراسیس کا جائزہ لے گی جبکہ کمیٹی فیکٹریز لگانے کیلئے سرمایہ کاروں کی درخواستوں پر این او سی کے بروقت اجراء کو یقینی بنائے گی۔

وزیراعلیٰ پنجاب سردار عثمان بزدار نے مزید کہا کہ صنعت لگے گی تو سرمایہ کاری آئے گی جبکہ معیشت مضبوط ہوگی اور کاروبار پھلے پھولے گا۔

صوبائی وزیر صنعت میاں اسلم اقبال، چیف سیکرٹری، سیکرٹریز لوکل گورنمنٹ، آبپاشی،صنعت، معدنیات ، ماحولیات ، سپیشل مانیٹرنگ یونٹ کے سربراہ اور متعلقہ حکام نے اجلاس میں شرکت کی۔