وزیراعلیٰ پنجاب سردار عثمان بزدار نے کہا ہے کہ سی پیک خوشحالی اور ترقی کا منصوبہ ہے۔

تفصیلات کے مطابق وزیراعلیٰ پنجاب سردار عثمان بزدار کی اسلام آباد میں سی پیک اتھارٹی کے آفس آمد ہوئی جہاں سی پیک اتھارٹی کے چیئرمین لیفٹیننٹ جنرل(ر) عاصم سلیم باجوہ نے وزیراعلیٰ عثمان بزدار کا خیرمقدم کیا۔

وزیراعلیٰ پنجاب عثمان بزدار کی عاصم سلیم باجوہ سے ملاقات میں سی پیک کے منصوبوں پر پیشرفت کے حوالے سے بات چیت ہوئی۔

 اس موقع پر چائنہ پاکستان اکنامک کوریڈور اتھارٹی کے چیئرمین لیفٹیننٹ جنرل (ر) عاصم سلیم باجوہ نے تفصیلی بریفنگ دی۔

چیئرمین سی پیک اتھارٹی لیفٹیننٹ جنرل(ر) عاصم سلیم باجوہ نے کہا کہ سی پیک منصوبوں پر کام کی رفتار کو مزید تیز کیا گیا ہے جبکہ سی پیک سے پاک چین تعلقات کو نئی جہت ملی ہے۔

ملاقات میں وزیراعلیٰ عثمان بزدار نے منصوبوں پر تیز رفتاری سے عملدرآمد پر چیئرمین سی پیک اتھارٹی لیفٹیننٹ جنرل(ر) عاصم سلیم باجوہ او ر ان کی ٹیم کی کاوشوں کوسراہا

عثمان بزدار نے کہا کہ چین پاکستان کا بااعتماد دوست ہے، سی پیک پراجیکٹس کی تکمیل سے پاکستانی معیشت مضبوط ہو گی۔

وزیراعلیٰ پنجاب نے یہ بھی کہا کہ سی پیک منصوبوں سے پنجاب کے صنعتی و زرعی شعبے میں نمایاں بہتری آئے گی۔

عثمان بزدار کا کہنا تھا کہ ڈی جی خان، ساہیوال اور میانوالی میں ماڈل ڈیری فارمز بنائیں گے جبکہ پنجاب میں اکنامک زونز میں ٹیکنالوجی پارک قائم کریں گے۔

وزیراعلیٰ پنجاب سردار عثمان بزدار کا مزید کہنا تھا کہ چین کی حیرت انگیز ترقی ہمارے لئے رول ماڈل ہے، چین کی ٹیکنالوجی سے استفادہ کر کے معیشت کی مضبوطی کے شعبوں کو فروغ دیں گے۔

وزیراعلیٰ پنجاب عثمان بزدار کی عاصم سلیم باجوہ سے ملاقات میں مشیر وزیراعلی سلمان شاہ اور متعلقہ حکام بھی  شریک ہوئے۔