صوبائی وزیر اطلاعات سید ناصر حسین شاہ نے کہا ہے کہ وزیر اعظم بوکلاہٹ کا شکار ہیں، ہم اب وزیر اعظم صاحب سے کہتے ہیں کہ آپ نے گھبرانا نہیں ہیں۔

تفصیلات کے مطابق صوبائی وزیر اطلاعات سید ناصر حسین شاہ نے سکھر پریس کلب میں پریس کانفرنس کرتے ہوئے کہا کہ پیپلزپارٹی کی اعلیٰ قیادت کے خلاف سیاسی انتقام جاری ہے جبکہ آصف علی زرداری بیمار ہیں پھر بھی وارنٹ جاری کئے گئے۔

سید ناصر حسین شاہ نے کہا کہ وارنٹ جاری کرنے کی مذمت کرتے ہیں، اس طرح کے ہتھکنڈے اپنائے جارہے ہیں جس سے ہمیں دباؤ کا شکار بنایا جاسکے۔

صوبائی وزیر اطلاعات نے یہ بھی کہا کہ وفاق اور نیب جیسے اداروں کی کاروائیاں افسوسناک ہیں جبکہ ماضی میں بھی پیپلز پارٹی کی طاقت کو کم کرنے کے لیے سیاسی انتقام کی سیاست کی جاتی رہی ہے۔

سید ناصر حسین شاہ نے کہا کہ آصف علی زرداری کی طبعیت خراب ہے ایسے میں اس طرح کی کاروائیاں نہیں کی جانیں چاہیے تھی کیونکہ ہم عدلیہ کا احترام کرتے ہیں اور ہماری اعلیٰ قیادت عدالتوں میں موجود مقدمات کا سامنا کرتی رہی ہے۔

صوبائی وزیر اطلاعات نے یپہ بھی کہا کہ ہم نے کبھی این آر او نہیں مانگا ہمیں این آر او نہیں چاہیئے ہے جبکہ وفاقی حکومت اپنے دوستوں کو این آر او دے چکی ہے۔

سید ناصر حسین شاہ کا کہنا تھا کہ وفاقی حکومت کو اندازہ ہوچکا ہے کہ پی پی کو یا اپوزیشن کی دیگر پارٹیوں کو دبایا نہیں سکتا اسی لئے پی ٹی حکومت نتقامی کاروائیاں کررہی ہے۔

صوبائی وزیر اطلاعات کا یہ بھی کہنا تھا کہ سندھ حکومت کے پاس اپنی گندم کی فصل محفوظ ہے جبکہ وفاقی وزراء سفید جھوٹ بولتے ہیں، آٹا مہنگا ہونے کا ذمیدار سندھ حکومت کو قرار دے رہے ہیں۔

سید ناصر حسین شاہ نے کہا کہ پی ٹی آئی حکومت کی نااہلی کی وجہ سے بڑی مقدار میں گندم اسمگل ہوئی ہے جبکہ عمران خان کی حکومت نے ڈالرز میں گندم پر سبسڈی دی۔

صوبائی وزیر اطلاعات نے اپنے بیان میں کہا کہ ڈاکٹرز اور پیرامیڈیکل اسٹاف کو سلام پیش کرتا ہوں جبکہ ڈاکٹرز اور پیرامیڈیکل اسٹاف کے کچھ مسائل ہیں وہ حل کئے جائیں گے۔

ناصر حسین شاہ نے یہ بھی کہا کہ وزیرصحت خود ڈاکٹرز اور پیرامیڈیکل اسٹاف کے معاملات کو دیکھ رہی ہیں جبکہ کورونا کی وباء میں ڈاکٹروں اور پیرامیڈیکل اسٹاف نے جو فرنٹ لائن سولجرز کا کردار ادا کیا ہے وہ قابل تعریف ہے۔

جلسے کے حوالے سے بات کرتے ہوئے صوبائی وزیر اطلاعات سید ناصر حسین شاہ نے مزید کہا کہ کراچی جلسے میں عوام کا سمندر ہوگا جبکہ بلاول بھٹو نے گوجرانوالہ جلسے میں بھی تمام رہنماؤں کو ایس او پیز پر عمل کرنے کا کہا ہے کیونکہ کورونا کی وباء پھر بڑھ رہی ہے اس لیے ایس او پیز پر دھیان رکھا جائے گا۔