چیئرمین پیپلزپارٹی بلاول بھٹو زرداری نے کہا ہے کہ بے نظیر بھٹو نے ملکی بقاء کےلیے اپنا خون دیا ہے۔

تفصیلات کے مطابق چیئرمین پیپلزپارٹی بلاول بھٹو زرداری نے باغ جناح کراچی میں پی ڈی ایم کے جلسے سے خطاب کرتے ہوئے کہا ہے کہ آج پاکستان کیلئےتاریخی دن ہے، سارےجمہوری کارکن راشدربانی کوسرخ سلام پیش کرتےہیں۔

چیئرمین پیپلزپارٹی نے کہا کہ شہید بی بی اورپیپلزپارٹی نے ملک کی بقا اور جمہوریت کیلئےاپنا خون دیا ہے، جس کی وجہ سے خون دیا وہ صبح ضرور آئے گی۔

بلاول بھٹو زرداری نے یہ بھی کہا کہ شہید محترمہ بے نظیر بھٹو اپنی ذات اور بہادری میں بے نظیر تھی، شہید محترمہ بے نظیر بھٹو نے کہا میں اپنی عوام اور اپنے کارکنان کے ساتھ رہوں گی۔

چیئرمین پیپلزپارٹی کا کہنا تھا کہ پاکستان کی تمام جمہوری قوتوں نے اس کارواں کا ساتھ دینا ہے،18 اکتوبر کو خونی رات تھی، ہم پر شہداء کا قرض ہے۔

بلاول بھٹو زرداری کا یہ بھی کہنا تھا کہ پی ٹی آئی کے دور حکومت میں تاریخی مہنگائی ہے جبکہ پنجاب کے ساتھ مزاق کیا جارہاہے، کے پی اور بلوچستان کے ساتھ ظلم ہورہا ہے۔

چیئرمین پیپلزپارٹی نے کہا کہ عوام کے حقوق کا وعدہ حکومت نے توڑ دیا ہے، جہاں عوام کے حق کی بات کرنی ہے وہاں عدلیہ پر دباؤ ہے میڈیا پر تالہ ہے، ان کو پابندیاں لگانے کا شوق ہے اس لئے نیوز پیپر، ٹی وی پر پابندی ہے۔

بلاول بھٹو زرداری نے یہ بھی کہا کہ عوام غربت کی چکی میں پس رہے ہیں، آٹا، چینی میں کرپشن ہے لیکن اس حکومت کوعوام کی بھوک دکھائی نہیں دیتی جبکہ یہ آئین کو نہیں مانتا ہے، اس کو عوام کے آنسو نظر نہیں آتے ہیں پھر بھی یہ جمہوریت ہونے کا دعویٰ کرتا ہے۔

چیئرمین پیپلزپارٹی کا کہنا تھا کہ تاریخ کا فیصلہ ہے خلق خدا کے سامنے بڑے بڑے امر نہیں رہے جبکہ اس شخص کا غرور عوام مٹی میں ملا دے گی۔

بلاول بھٹو زرداری کا یہ بھی کہنا تھا کہ جب آمرانہ قوتیں عوام کے حقوق پر حملہ آور ہوئی تو پیپلز پارٹی سامنے کھڑی ہوئی جبکہ ہم نے اس ملک پر جمہوریت کا دفاع اپنے خون سے کیا ہے، غریب عوام کا ساتھ کبھی نہیں چھوڑا۔

چیئرمین پیپلزپارٹی بلاول بھٹو زرداری کا مزید کہنا تھا کہ آج پھر پاکستان کے آئین پر حملے ہورہے ہیں، جو حق کی آواز بلند کرنے والوں کو جیل میں ڈالنا چاہتے ہیں، کس کس کو جیل میں ڈالو گے جبکہ اگر ہمیں پارلیمان میں نہیں بولنے دیں گے تو سڑکوں پر لڑیں گے۔