چیف سیکرٹری کاظم نیاز نے کہا ہے کہ آٹا سمگلنگ ناقابل برداشت ہے انتظامیہ ہر حال میں اسکی روک تھام یقینی بنائے۔

تفصیلات کے مطابق چیف سیکرٹری اور آئی جی خیبرپختونخوا کی زیر صدارت مصنوعی مہنگائی کنٹرول کرنے کے حوالے سے اجلاس ہوا جس میں ڈویژنل کمشنرز نے مصنوعی مہنگائی کے خلاف کاروائیوں کے حوالے سے اجلاس کو اگاہ کیا گیا۔

اجلاس میں بریفنگ کے دوران کہا گیا کہ انتظامیہ مسلسل بازاروں کا دورہ کرکے سرکاری نرخناموں پرعمل داری یقینی بنارہی ہے جبکہ سرکاری نرخناموں کی خلاف ورزی کرنے والوں پر بھاری جرمانے عائد کئے جارہے ہیں۔

اجلاس میں بریفنگ کے دوران مزید کہا گیا کہ کاروائیوں کے نتیجے میں اشیاء خوردونوش کی قیمتوں میں کافی کمی آئی ہے اور کابینہ اجلاس کے فیصلے کے مطابق سستے بازار قائم کرنے پر کام تیزی سے جاری ہے جبکہ کئی جگہوں پر انصاف سستا بازار کے لئے جگہوں کی نشاندہی ہوچکی ہے۔

چیف سیکرٹری کاظم نیاز نے مصنوعی مہنگائی کے خلاف اٹھائے گئے اقدامات پراظہار اطمینان کیا اور منصوعی مہنگائی کرنے والوں کے خلاف کاروائیاں مزید تیز کرنے کی ہدایت دی۔

 کاظم نیاز نے کہا کہ مصنوعی مہنگائی پیدا کرنے والوں کے خلاف گھیرا مزید تنگ کیا جائے جبکہ آٹا ،چینی اور اشیاء خوردونوش کے دیگر اشیاء ضروریہ کی قیمتوں پر کڑی نظر رکھیں۔

چیف سیکرٹری کاظم نیاز نے مزید کہا کہ آٹا سمگلنگ ناقابل برداشت ہے انتظامیہ ہر حال میں اسکی روک تھام یقینی بنائے جبکہ کابینہ اجلاس کے فیصلے کے مطابق تمام ڈویژن میں سستے بازار جلد ازجلد قائم کی جائے اور انتظامیہ سستے بازاروں میں تمام سہولیات کی فراہمی یقینی بنائے۔

اجلاس میں تمام محکموں کے انتظامی سیکرٹرز شریک ہوئے جبکہ ڈویژنل کمشنرزاورریجنل پولیس افیسران نے ویڈیو کانفرنس کے ذریعے اجلاس میں شرکت کی۔