وزیراعظم عمران خان نے کہا ہے کہ اقوام متحدہ کے امن مشنز میں پاکستان نے بین الاقوامی امن و سلامتی کے تحفظ کے لئے اہم کردار ادا کیا ہے۔

تفصیلات کے مطابق وزیراعظم عمران خان نے اقوام متحدہ کی 75 ویں سالگرہ کے موقع پر پیغام میں کہا کہ آج عالمی برادری اقوام متحدہ کی ’75 ویں سالگرہ کی یاد مناتی ہے۔

عمران خان نے کہا کہ آج سے 75 سال پہلے آنے والی نسلوں کو جنگ کی آغوش سے بچانے کا عزم کیا گیا، پاکستان کو فخر ہے کہ انسانی حقوق اور بنیادی آزادیوں، عالمگیر اقدار کو برقرار رکھنے میں اپنا کردار ادا کررہا ہے۔

 وزیرِاعظم نے یہ بھی کہا کہ میں پاکستان سمیت تمام امن فوجیوں کو خراج تحسین پیش کرنا چاہتا ہوں جبکہ پاکستان غیر ملکی قبضے میں رہنے والے اور خود ارادیت کے حق کی حمایت کرتا ہے۔

عمران خان کا کہنا تھا کہ جموں وکشمیر تنازعہ سات دہائیوں سے زیادہ عرصے سے اقوام متحدہ کے ایجنڈے پر رہنے کے باوجود تاحال حل طلب ہے جبکہ جموں وکشمیر کے عوام آج بھی اقوام متحدہ کے ذریعہ اپنے حق خودارادیت کے حق کی تکمیل کے منتظر ہیں۔

وزیرِاعظم عمران خان کا مزید کہنا تھا کہ5 اگست 2019 کو بھارت کی یکطرفہ اور غیر قانونی کارروائیوں کے بعد مقبوضہ جموں و کشمیر کی صورتحال مزید بگڑ گئی ہے، عالمی برادری جموں و کشمیر سے متعلق اقوام متحدہ کی سلامتی کونسل کی قراردادوں پر عمل درآمد یقینی بنائے۔