ترکی کے وزیر دفاع جنرل ریٹائرڈ ہولوسی آکار نے کہا ہے کہ پاکستان اور ترکی کے مابین دفاعی تعاون کو مزید وسعت دینے کیلئے تیارہیں۔

ترکی کے وزیر دفاع جنرل ریٹائرڈ ہولوسی آکار کی دفاعی وفد کے ساتھ اسلام آباد میں وزیردفاع پرویز خٹک سے ملاقات ہوئی۔

ملاقات میں وزیردفاع پرویز خٹک نے  دونوں اسلامی برادرممالک کے مابین تعلقات کوتقویت دینے کیلئے  ترکی کے دفاعی وفد کے دورے کوسراہا۔

ملاقات میں پرویز خٹک نے کہا کہ کشمیر کے اصولی موقف پرساتھ دینے اور ایف اے ٹی ایف میں پاکستان کی حمایت پرترکی کے شکرگزار ہیں۔

وزیر دفاع نے یہ بھی کہا کہ پاکستان نے علاقائی امن اور خطے کے استحکام کیلئے ایک اہم کردارادا کیا ہے۔

پرویز خٹک کا کہنا تھا کہ صدررجب طیب اردوان ایک ویژنری رہنما اورپاکستان کے مخلص دوست ہیں جبکہ پاکستان ترکی میں ہونے والے اعلیٰ سطحی فوجی ڈائیلاگ کے آئندہ15ویں رائونڈ میں حصہ لینے کیلئے تیارہے۔

وزیر دفاع پرویز خٹک کا مزید کہنا تھا کہ دونوں ممالک کے مابین مشقوں سے دونوں ریاستوں کی صلاحیتوں اور دفاعی قوت میں اضافہ ہوگا۔

ملاقات میں ترکی کے وزیر دفاع جنرل ریٹائرڈ ہولوسی آکار نے کہا کہ پاکستان اورترکی کے مابین تعلقات کی ایک لمبی تاریخ ہے جبکہ پاکستان اورترکی کے مابین دفاعی تعاون کو مزید وسعت دینے کیلئے تیارہیں۔