وفاقی وزیر داخلہ اعجاز احمد شاہ کی جانب سے ملک بھر کی عوام سے کورونا کی صورتحال پر عوام سے اپیل کی گئی ہے۔

تفصیلات کے مطابق ننکانہ صاحب پر میڈیا سے بات چیت کے دوران وزیر داخلہ اعجاز احمد شاہ کا کہنا تھا کہ خدا کا واسطہ ہے کہ احتیاط کریں اور کورونا کی صورتحال پر احتیاطی تدابیر اختیار کریں۔

انہوں نے کہا ہے کہ ملک میں اگر کورونا کا ریٹ % 6 سے اوپر آگیا ہے تو دوبارہ لاک ڈاؤن ہو سکتا ہے اور اگر دوبارہ لاک ڈون ہوا تو معیشت کو نقصان ہوگا۔

انہوں نے مزید کہا کہ ملک مین اگر دوبارہ لاک ڈاون ہوا تو غریب آدمی کے لئے روزی کمانا مشکل ہو جائے گا۔

یاد رہے کہ اس سے قبل پاکستان میں کورونا وائرس کی صورتحال کا جائزہ لینے کے لیے این سی او سی کا خصوصی اجلاس ہوا، جس میں ملک میں کورونا وائرس کے بڑھتے ہوئے رجحان پر تشویش کا اظہار کیا گیا ہے۔

اجلاس کے دوران تمام صوبوں کو ہدایات جاری کی گئیں کہ کورونا وائرس کی متوقع صورتحال کے پیش نظر ہسپتالوں میں ضروری طبی سہولیات کی فراہمی کو یقینی بنایا جائے۔

وفاقی وزیر برائے منصوبہ بندی اسد عمر کا کہنا ہے کہ کورونا وائرس کی دوسری لہر کی آمد اور کورونا کیسز میں اضافے پر نیشنل کمانڈ اینڈ آپریشن سنٹر (این سی او سی) نے شہریوں کی مدد لینے کا فیصلہ کیا ہے۔

اس سلسلے میں شہریوں سے درخواست کی گئی ہے کہ جہاں کہیں بھی کورونا ایس او پیز کی خلاف ورزی دیکھیں این سی او سی کے دیے گئے نمبر پر شکایت بھیج دیں۔