کراچی ہلکی بارش نے ایک بار پھر کے الیکٹرک کا پول کھول دیا ہلکی سی بارش میں کے الیکٹرک کے 300 سے زائد فیڈر ٹرپ ہوگئے ہیں۔

تفصیلات کے مطابق قومی ایئرلائن پی آئی اے کے مختلف شعبوں کی بجلی تین بجے سے بند ہے جبکہ پی آئی اے اسٹاف ٹائون شپ کی بجلی بھی بند کردی گئی ہے۔

سندھ سیکریٹریٹ کے مختلف ڈیپارٹمنٹس کی بجلی ہلکی بارش کے بعد بند ہوگئی جبکہ گلستان جوہر، کلفٹن، ڈیفنس کے مختلف بلاکس میں بھی بجلی معطل ہے۔

اس حوالے سے کے الیکٹرک ذرسائع کا کہنا ہے کہ نے شہریوں کو کرنٹ سے محفوظ رکھنے کیلئے نئی حکمت عملی اپنائی گئی ہے، جس کے تحت کے الیکٹرک نے ٹرانسمیشن لائن میں ارتھنگ سسٹم بہتر کرنے کیلئے فیڈرز بند کیے۔

کراچی میں بارش کے بعد جن علاقوں میں بجلی کی فراہمی معطل کی گئی ہے ان میں سرجانی ٹاؤن، تیسرٹاؤن، نارتھ کراچی، نارتھ ناظم آباد، ڈیفنس، سولجربازار، گلستان جوہر، گلشن اقبال، فیڈرل بی ایریا شامل ہیں۔

اس کے علاوہ لانڈھی، کورنگی، ملیر، ماڈل کالونی، کھوکھرا پار، ماڑی پور، کیماڑی، بلدیہ، سائٹ، اورنگی ٹاؤن، گڈاپ، گلشن معمار، گلشن حدید اور اطراف کے علاقے بھی بجلی سے محروم ہیں۔ متاثرہ شہریوں کا کہنا ہے کہ کے الیکٹرک انتظامیہ کے شکایتی نمبر پر بجلی کی بحالی کا کوئی وقت نہیں بتایا جارہا۔

واضح رہے کہ اس سے قبل ہونے والی بارشوں میں کراچی کے مختلف علاقوں میں ہلکی بارش ہوئی جس کے بعد شہر کے متعدد علاقوں کی بجلی غائب ہوگئی۔ 150 سے زائد فیڈر ٹرپ ہونے کے باعث  شہر کے مضافاتی اور پوش علاقے بجلی سے محروم ہوگئے تھے۔