سی ای او پی آئی اے ارشد ملک نے کہا ہے کہ نئے گوادر ائیرپورٹ پر پی آئی اے گوادر سے پورے ملک اور بین الاقوامی پروازیں چلائے گا۔

تفصیلات کے مطابق سی ای او پی آئی اے کی راولپنڈی چیمبر آف کامرس اینڈ انڈسٹری آمد ہوئی جہاں صدر راولپنڈی چیمبرز محمد ناصر مرزا، گروپ لیڈر سہیل الطاف اور دیگر عہدیداروں نے ان کا استقبال کیا

میٹنگ کے دوران چیمبرز کے عہدیداروں کی جانب سے گوادر کی اسلام آباد سے براہ راست پرواز کی درخواست کی جبکہ افغانستان، گوادر، یورپ و امریکہ کی پروازین چلانے اور بڑھانے کی استدعا بھی کی جس پر پی آئی اے سی ای او نے تعاون کی یقین دہانی اور گوادر آپریشن سپانسر کرنے کا وعدہ کیا۔

اس موقع پر سی ای او پی آئی اے ارشد ملک نے کہا کہ گوادر کی چھوٹی رن وے اور ری فیولنگ نا ہونے کے باعث ابھی پروازیں براستہ کراچی مجبوری ہے جبکہ گوادر کو فروغ دینے کے قومی مقصد کے تحت، پی آئی اے گوادر کی پروازوں  پر کوئی منافع نہیں کمائے گا۔

سی ای او پی آئی اے نے کہا کہ پی ائی اے افغانستان کیلئے تجارتی مقاصد کے تحت تمام اقدامات کی مکمل حمایت اور تعاون کرے گا۔

ارشد ملک نے یہ بھی کہا کہ یورپ، برطانیہ اور امریکہ کی براہ راست پروازوں کا دارومدار پابندی کے خاتمے سے ہے، پی آئی اے نے اپنے حصے کے اقدامات مکمل کرلئے ہیں اب فیصلے کا انتظار ہے جس میں ریگولیٹر نے بھی اپنا کردار ادا کرنا ہے۔

سی ای او پی آئی اے ارشد ملک نے مزید کہا کہ راولپنڈی چیمبرز کیلئے خصوصی کارپوریٹ پیکج کا اعلان، تمام معملات پر جلد مفاہمتی یاداشت پر دستخط کیا جائے گا۔