وزیراعظم عمران خان نے کہا ہے کہ پاکستانی معیشت خطے میں سب سے زیادہ تیزی سے ابھر رہی ہے۔

تفصیلات کے مطابق وزیراعظم عمران خان کی صدارت میں ملکی معیشت کے حوالے سے اجلاس ہوا جس میں میں ملکی معیشت  کی صورتحال  پر تبادلہ خیال کیا گیا۔

اجلاس میں کورونا کی دوسری لہر کے  تناظر میں معیشت پر پڑنے والے ممکنہ اثرات پر بھی گفتگو کی گئی جبکہ غریب طبقے کو تحفظ کی فراہمی کے حوالے سے کفالت پروگرام  پر تفصیلی بات چیت کی گئی۔

اس موقع پر وزیرِاعظم عمران خان نے معاشی نظم و ضبط اور ملکی قرضوں  کے بہتر انتظام کے حوالے سے معاشی ٹیم کی کاوشوں کو سراہا جبکہ لارج سکیل مینیوفیکچرنگ  کے شعبے میں  سامنے آنے والے مثبت رجحانات کو معیشت کیلئے انتہائی خوش آئند قرار دیا۔

وزیرِ اعظم نے ملکی معیشت میں بہتری اور استحکام کی صورتحال پر اطمینان کا اظہار کرتے ہوئے کہا کہ پاکستانی معیشت خطے میں سب سے زیادہ تیزی سے ابھر رہی ہے اور اس کا سہرا معاشی ٹیم کی مربوط حکمتِ عملی کو جاتا ہے۔

وزیرِاعظم عمران خان نے مزید کہا کہ حکومت کی جانب سے  کورونا کے خلاف  اختیار کی جانے والی حکمت عملی کو عالمی سطح پر سراہا گیا، معیشت کی بہتری کے ثمرات عام آدمی تک جلد سے جلد پہنچنے چائیے۔

اجلاس میں شاہ محمود قریشی،  خسرو بختیار، محمد حماد اظہر، عبدالحفیظ شیخ، ڈاکٹر عشرت حسین اور ڈاکٹر  وقارمسعود بھی  شریک ہوئے۔