وزیر خارجہ مخدوم شاہ محمود قریشی کا ہندوستان کی جانب سے مسلمانوں کی نسل کشی کے حوالے سے جینو سائیڈ واچ کے سربراہ کے حالیہ بیان پر ردعمل سامنے آگیا۔

تفصیلات کے مطابق وزیر خارجہ مخدوم شاہ محمود قریشی نے اپنے بیان میں کہا کہ جینو سائیڈ واچ کے سربراہ کا بیان ہمارے موقف اور نکتہ ء نظر کی تائید ہے۔

شاہ محمود قریشی نے کہا کہ پاکستان، پہلے ہی سے مختلف فورمز پر اس تمام صورتحال کی نشاندہی کر چکا ہے اور اپنی تشویش کا اظہار کرتا چلا آرہا ہے، ہماری تشویش کل بھی درست تھی اور آج بھی درست ہے۔

وزیر خارجہ نے یہ بھی کہا کہ مقبوضہ جموں و کشمیر میں حالات مزید خراب ہوتے چلے جا رہے ہیں جبکہ مسلمانوں کے ساتھ ناروا سلوک صرف وادی تک محدود نہیں یہ سلوک پورے ہندوستان کے مسلمانوں کے ساتھ روا رکھا جا رہا ہے۔

شاہ محمود قریشی کا کہنا تھا کہ دہلی اور گجرات میں جو ہوا وہ سب کے سامنے ہے جبکہ ہم نے یہ بھی بتایا کہ ہندوستان کیسے بھارت کے اندر اور پاکستان کے گردونواح میں دہشتگردی کی ٹریننگ کے مراکز کھولے ہوئے ہے۔

وزیر خارجہ مخدوم شاہ محمود قریشی کا مزید کہنا تھا کہ ہم نہیں چاہیں گے کہ بھارت پاکستان کے خلاف کسی پڑوسی ملک کی سرزمینِ کو استعمال کرے اس لیے کل یہ نکتہ میں نے کابل میں اپنے افغان ہم منصب کے ساتھ ہونیوالی ملاقات میں بھی اٹھایا۔